Chanchinthar Mizoram Politics Serchhip

MNF-in BJP chhiatpui an hlauh vangin an thawhpui duh lo:JV Hluna

SERCHHIP: BJP Mizoram State President Prof. Dr. JV Hluna chuan MNF-in BJP chu chhiatpui an hlauh vangin Mizoramah an thawhpui duh lo tih a sawi.

He thu hi nimina Jemela Hotel, Serchhip Bazar-a Lok Sabha inthlanpui neih tur chungchanga Serchhipa thu-thar lakhawmtute a kawmnaah a sawi a, thuthar lakhawmtute hnenah Dr. JV Hluna Lok Sabha inthlanpui lo awm tura an party Candidate Nirupam Chakma leh a pa, Snebu Kumar Chakma te chu Mizo zingah an mikhual lo hle tih sawiin, politician an ni a, MLA an nih lai pawhin sawrkarah chanvo pawimawh tak tak an chelh tawh thu a sawi.

Dr. JV Hluna chuan MP atan Mizoramah politician ni lo thlan ṭhin an ni a, Lok Sabha session pawh en ngai lo te MP-a thlan an nih ṭhin avangin parliament-ah an ngampa tawk lo tih sawiin, Nirupam Chakma chu politician a nih bakah hindi leh english pawh nâl taka a thiam avangin Lok Sabha debate-ah pawh mikhual lo tura a ngaih thu a sawi a, kum 30 chhung Delhi-a sawrkar hnathawk tawh nih ringawt te, football lam kaihruaia Delhi-a thleng ṭhin ringawt te tan parliament-ah a ngampat ngawt theih loh tih a sawi a, parliament-a rawngbawlna zau zawk neih tumte tan Lok Sabha chu Pathian thu sawina tur a ni lova, sakhaw thu sawina hmun a nih dawn loh avangin Mizoram tan thil ṭha puak chhuah a har dawn a ni a ti bawk.

BJP hruaitu Ram Yadav-a’n Nirupam Chakma chu MP atana thlan tlin a nih chuan a kuta dah tura a sawi avangin central minister a nih ngei an rin thu Dr. JV Hluna chuana sawi a, Citizenship Amendment Bill (CAB) chungchang pawh sawi chhuakin, BJP hotu lu Amit Shah chuan sawrkarna an siam leh ve leh CAB pass ngei ngei a tiam tih a sawi a, amaherawh chu he thu a sawi chhunzawmna chu political party dangten an sawi lang ngai lo tih a sawi a, Amit Shah chuan he thu a sawi chhunzawmnaah hian CAB tharah chuan hmarchhak state te him ngeina tur provision thar dah a nih tur thu a sawi chhunzawm tih sawiin, hei vang hian CAB duh lova hmarchhaka na taka dodaltu Assam-a party lian AGP pawh NDA-ah an lut leh vek tawh a ni a ti a, heti chunga lo insawi ṭhaih chu intihrehawm mai mai a ni, a ti bawk.

He dân hman a nih a Mizorama lo lût tura hlauh ber Chakma te hi Buddist an ni a, Bangladesh-ah Buddist tihduhdahna a awm lova, rawn luh an tum a nih pawhin an sakhua avanga tihduhdah an tuar tih finfiahna tur an neih a ngai dawn a, chuvangin awlsam takin foreigner te an lo lut ngawt thei dawn lo tih a sawi a, hei bakah hian India-in khua leh tuia a lo pawm tawh Chakma te hian ram dang aṭanga an zinga foreigner chakma lo lut tur hi an duh bik lo tih sawiin, CAB chu hlauh lutuk tur a ni hran lo tih a sawi bawk.

MNF nen NDA-a thawk-ho si a, Mizorama an thawhho loh chhan zawhna chhangin Dr. JV Hluna chuan Mizo mipuiin BJP an thinhrik avangin, MNF-in BJP thawhpui chu an chhiatpui an hlauh a vangin an thawhpui duh lo tih a sawi a, MNF chuan BJP vote pawh an duh lo tih a sawi a, hetihlai hian MNF nen an inkar boruak chu a chhe lo tih sawiin, Aizawl West-I Assembly by-election-ah pawh candidate hran siam lovin MNF candidate an pui dawn tih a sawi.

Candidate atan Chakma an neih chhan zawhna pawh chhangin, Dr. JV Hluna chuan a tirah Mizo ngei candidate neih tumin rawtna an thehluh thu a sawi a, amaherawhchu central-a an hotuten BJP candidate chu Mizo pawh nise Mizo mipuiah vote an hmuh ṭhat loh leh an rin avangin hnam tenau zawk aṭanga candidate siam chu hnam tenau zingah vote hlâwm hmuh beisei a nih bakah Mizo BJP hruaitute vote engemawzat nena an hmuh a, MP Candidate dangten Mizo mipui vote an insem rual viau a nih bawk chuan an tan kawng a tluan theih deuh beisei vangin candidate atan Chakma an dah ta niin a sawi bawk.

Dr. JV Hluna hi K.Vanlalruati, IT & Social media convener leh KH Rohlua, Serchhip District BJP President leh Secretary Johana ten an ṭawiawm a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.