Chanchinthar Serchhip Zirna

MZP-in Serchhip District-a zirlai tiṭha te chawimawina hlân

Serchhip-ah Education Complex din tum a ni:Edn. Minister

SERCHHIP: MZP Hqrs. Serchhipin kumin 2015-a Serchhip District chhunga  HSLC, HSSLC leh Undergraduate tiṭha zualte chawimawina nimina Serchhip DC conference hall-a a buatsaihah Chief Minister Pu Lal Thanhawla chuan a hmanpui.
Chief Minister chuan chawimawina hi a bul ṭanna chauh a ni a, takna leh tumruhna nen zira, hmantlak leh chhawrtlak ni tura ṭang mar reng turin a fuih a. Zirlaite tihhmasak ber tur chu Pathian hlauh leh nu leh pa te thuawih a ni tiin, aia upate zah thiam turin a chah bawk a. Tum mumal neiloa lehkha zir hian thui min thlen thei lova, chuvangin takna ngaipawimawh hle turin zirlaite chu a chah a. Kan hlawhtlinna pass percentage te hi sâng viaua kan hriat laiin, phaiah te chuan a sâng lemlo a ni tih kan hriat a ṭha a ti.

Pu Hawla chuan graduate ni si, sawrkara in ziak tling zo silo, kuthnathawh hmusit tawh laklawh si Mizo ṭhalaite zingah an tam a ni tiin, kuthnathawh hi khawvela hna zahawm ber a ni a ti a. Intodelh turin hna zahthlak a awmlo a ti a, kan ngaihtuahna kan siam thar a ṭul hle a ni a ti a. Mizoramah pawl hrang hrang tam tak a awm thu sawiin, Chief Minister chuan heng pawl tam zawkte hi sawrkar dodal pawl an nih loh pawhin, sawrkara innghat an ni a ti a. Heng pawlte hian ṭhatna an nei em tih min ngaihtuah tir ṭhin a ni a ti.

Chief Minister ṭawiawmtu Pu H.Rohluna, Minister for School Education chuan chawimawina hi zirlaite tan fuihna a ni a ti a. Zirlaite entawn turin HSLC leh HSSLC a topper te tan ‘Chief Minister Award’ pawh siam a nih thu a sawi a. Chhawrtlak leh hmantlak ni turin tih tak takna a ṭul a ni tiin, thil dang nen kalpah chi a nilo a ti. Minister chuan Serchhipah Education Complex Cheng nuai 120 senna tur siam tum mek a nih thu a sawi a. Primary leh Middle School Aided te tan kumtin grant pek thin anih thu leh Govt Primary leh Middle School te tan ‘maintainance grant’ pek thin an nih thu a sawi a. He ‘maintainance grant’ hi a hman lohna tura hman a nih chuan hrem theih an ni a ti.

Zirlai tiṭha zual chawimawite hi HSLC a Distinction a passed zirlai 13, HSSLC a 1st Division a passed 17 te leh BA/BSc a 1st Divisiona passed 21 te hnenah chawimawina thuziak, citation hlan an ni a. HSLC leh HSSLC a 100% passed School te hnenah chawimawina thilpek hlan a ni bawk.

Chawimawina inkhawm hi MZP Sub Hqrs, Serchhip Pre-sident T.Biakchamliana’n kai-hruaiin, Chief Minister remchan hun an nghah avanga tlai tawh taka chawimawina hun hi buatsaih a nih thu a sawi.

Chief Minister hi a nupui Pi Lal Riliani bakah Pu Joseph Lalhimpuia, Parliamentary Secretary leh Pu T.Sangkunga, MLA & Chairman, Mizoram Youth Commission ten n tawiawm bawk a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.