Chanchinthar Mizoram Zirna

MZU VC nghet pek ngiatin zirlai leh hnathawk te la dang zel

Mizoram University Students’ Council (MZUSC) chuan Vice Chancellor nghet pek an nih hma chu MZU-a zirna leh hnathawh dangte tihtawp chhunzawm zel an tum thu an sawi.

MZUSC Vice President Lalsawmsanga sawi dan chuan nimin khan MZUSC Executive Committee an ṭhukhawm a, an hmalak leh an thlen chinte thlirin an hmalakna chu kalpui chhun-zawm zel an rel a, vawiinah Governor hmuin an thil phût te an sawipui dawn a ni.

Nimin khan MZU zirlaite chu University Gate-ah duty lehin zirlai leh hnathawkte University Campus-a an lût tur an dang leh a, Police duty te pawh awm mahse buaina chhuak loin boruak a ṭha tih MZUSC Vice President chuan a sawi a ni.

Pachhunga University College Students’ Union chuan MZUSC-in Vice Chancellor nghet nei tura hma an la mek chu an thlawp thu nimin khan thu-chhuah siamin an sawi a, an thlâwpzia lantir nan nimin khan College staff leh zirlaite College kal tur pawh an dang tih an sawi a, MZU-in Vice Chancellor nghet a nei lo chuan hma-sawnna tur tam tak a tikhawtlai a, appointment leh promotion tam tak a dan bawk avangin Mizoram University Vice Chancellor thar ruat thuai turin sawr-kar laipui an phût tih an thu-chhuahah chuan an tarlang bawk.

Hetihlai hian nimin khan Mizoram University Acting Vice Chancellor Prof. Lianzela leh Registrar Pu Zothankhuma te chuan MZU Chief Rector, Governor Lt. Gen. Nirbhay Sharma hmuin Mizoram University-a Vice Chancellor nghet dah a nih theih nana hma an lak tawh dan te an sawipui a, Governor chuan Mizoram University chu India rama University ṭha berte zinga mi a nih angin lehkha zir chu dah pawimawh hmasak ber tur a ni a, zirlai naupangte lehkha zir nan boruak muanawm siam a ngai a ni, a ti a, Vice Chancellor chungchangah Ministry of Human Resource Development Minister leh midang te nena vawi engemaw zât an lo indawr tawh thu leh tunhnaia New Delhi-a a zin pawh khan sawrkar laipuia hotute sawipui lehin, Vice Chancellor thlang tura hma lâk a nih thu an lo hrilh tih a sawi a, zirlai tiṭhuanawp zawnga thil duhawm lo a thlen loh nan zirlai leh zirtirtute chu fimkhur tura a duh thu leh Vice Chancellor nghet dah thuai a beisei thu a sawi a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.