Chanchinthar Serchhip

Nikum chhungin MGNREGS-ah cheng nuai 2106.37 hmangral

DRDA kaltlanga hnathawh zinga mi MGNREGS hnuaiah kum 2012-2013 khan Serchhip District-ah ni 92 chhung inhlawhna siam a ni a, hemi atan hian pawisa sanctioned cheng nuai 2113.119 aṭangin cheng nuai 2106.37 hmanral a ni.

He thu hi nimina Serchhip DC’s Meeting Room-a Serchhip District Level Vigilance and Monitoring Committee neihnaah sawilan a ni a, ni 100 inhlawhna siam a nih theih nan State Sawrkarin pawisa a thawh ve tur te a hun takah thawh thei ṭhin se a ṭhat thu sawilan niin, thuneitute hnenah hma la chak turin thlen tum a ni bawk. Kum 2012-2013 chhungin Serchhip RD Block huam chhungah Job Card 11060 pek chhuah a ni a, E.Lungdar RD Block huam chhungah Job Card 3196 pek chhuah a ni bawk.

He Meeting-ah hian Committee Chairman Pu CL Ruala, Lok Sabha MP, Co- Chairman Pu Lalhmingliana, Rajya Sabha MP, Pu Lalthansanga, MLA (Hrangturzo Constituency) ten he hun hi an hmanpui a, Sawrkar laipuiin District chhung hmasawnna hna a ruahman chi hrang hrangte kalpui a nih dan leh hmasawn dan chi hrang hrangte thlirho a sawiho a ni.

Co-Chairman Pu Lalhmingliana chuan MGNREGS hna kalpui dan chungchanga VC te leh VEC te inkara harsatna awm ṭhin chu ṭhalo a tih thu leh BDO te chuan an bial chhunga hetiang harsatna hi lo zir chiang se a duh thu leh Meeting neih leh hmasa berah report thehlut tura a duh thu a sawi a ni.

IAY hnuaiah kum 2012-2013 chhungin Serchhip District-ah In 70 sak a ni a, heng zinga 46 hi Serchhip RD Block hnuaia mi a ni a, a bak 24 hi E.Lungdar R.D. Block hnuai ami a ni.

Nirmal Bharat Abhiyan (NBA) hnuaiah March, 2013 thleng khan inthiarna (Toilets/Latrines) 7451 siam a ni tawh a, BPL chhungkaw 4398 (Serchhip RD Block – 2945, E.Lungdar RD Block – 1453) tan inthiarna siamsak an ni tawh a, APL chhungkaw 2804 (Serchhip RD Block – 1870, E.Lungdar RD Block – 934) tan siam a ni tawh bawk. School 80 (Serchhip RD Block – 58, E.Lungdar RD Block – 22) ah leh Anganwadi Centre 92 (Serchhip RD Block – 68, E.Lungdar RD Block – 24) ah inthiarna siamsak an ni a, Vantlang inthiarna hmun 77 (Serchhip RD Block – 67, E.Lungdar R.D Block – 10) ah siam ani tawh bawk. Khawfai lawmman dawng khaw 15 (Serchhip RD Block – 10, E.Lungdar RD Block – 5) an awm tawh bawk a ni.

NRDWP hnuaia pawisa dawn cheng nuai 1115.6077 aṭangin cheng nuai 1097.05071 hman a ni tawh a, hemi atana scheme siam hrang hrang 9 zinga 5 chu zawhfel tawh a ni a, a dang 4 chu hnathawh mek niin reilote ah thawh zawh vek anih beisei a ni.

National Social Assistance Programme hnuaiah Tar Pension (IGNOAPS) dawngtu mi 1625 an awm mek a, Tar pension la thar tura dilna 18 a awm mek bawk a ni. Hmeithai Pension (IGNWPS) dawngtu mi 54 an awm mek bawk a, Rualbanlo tanpuina (IGNDPS) dawng mi 35 an awm mek, National Family Benefit Scheme hnuaiah tanpuina pek tur `10,000/- ni ṭhin chu `20,000/- ah tih pun a ni a, hemi atan hian dilna lut chhungkaw 23 hnen atangin a awm a, mahse Sawrkar Laipuiin Serchhip district tan chhungkaw 12 chauh a ruahman sak avangin an zing aṭang hian chhungkaw 12 thlan chhuah a ni tawh a ni.

He meetingah hian District Bawrhsap Pi Juhi Mukherjee, IAS chuan tunhnaia Aizawl Laipuitlanga in chim avanga chhiat tawk te a tawrhpui thu a sawi a, Serchhip District pawhin khuarel chhiat rupna hi tawng ve thei reng a nih avangin hemi lo hmachhawn tur hian Sawrkar Department tin te ruahmanna mumal tak neih vek a ṭul thu a sawi a ni.

Nimin meetingah hian Central Development Scheme hrang hrang khawihtu Department aiawhte an kal ṭha hle a, an hnathawhna kawnga harsatna an tawh te, an mamawhte leh an hlawhtlinna te sawi chhuah niin hmalak chhunzawm zel dan tur te pawh an sawiho a ni.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.