Chanchinthar Mizoram

PHE Department leh Central YMA-ten thawhdunna thuthlung ziak

Nimin khan PHE Department Engineer-in-Chief pisaah PHE Department leh CYMA chuan tuihna humhalh leh a awmsa tihpun kawnga thawhdunna thuthlung an ziak a, PHE Department aiawhin Engineer-in-Chief Pu Lalmuanzova chuan hming ziakin CYMA aiawhin CYMA President Pu Lalbiakzuala chuan hming a ziak bawk a ni.

Pu Lalmuanzova chuan PHED leh CYMA ten kum 2012-a tuihna humhalh leh a awmsa tihpun kawnga thawhdunna thuthlung an ziah chu a lo tawp tawh avangin tuna kum 4 dang (2017-2021) thawhdunna an ziak leh thei chu lawmawm a tih thu a sawi a, he thawhdun-na hian Zoram hmun hrang hrangah rah duhawm a chhuah mek thu leh tui hnar ram te vât lova humhalh nachang kan hre chho zel chu lawmawm a tih thu a sawi bawk a, hmun thenkhatah chuan YMA, VC te leh sawrkar department dangte nen thawkhoin tuihnar ram mimal kuta awm tawhte pawh neih lêtsak lehin, tuihna awm leh thei tur zawnga ram enkawl mek a nih thu a sawi bawk a ni.

He hunah hian CYMA President Pu Lalbiakzuala pawhin thu sawiin, hnam ringawt humhalha ram humhalh tel si loh chu a khingbai a ni a ti a, kan tuihna neih chhunte kan humhalh loh chuan a tuartu tur chu keimahni tho kan ni tiin ṭhang-tharte tana chhenfakawm ni ngei thei tura tuihna humhalh a pawimawh thu a sawi bawk.

PHED leh CYMA thawh-dunna thuthlung ziah hi kum 4 chhung (2017-2021) atan a ni a, September 2012 khan kum 4 chhung atan thawhdunna lo ziak tawhin, he thawhdunna hnuaiah hian Mizoram puma Group YMA leh Branch YMA hrang hrang ten tuihna humhalh leh a awmsa tihpun kawngah kumtin inelna neiin YMA General Conference-ah lawmman sem ṭhin a ni.

PHED leh CYMA te hian Swachh Bharat Mission (Gramin) hmalakna pakhat atan ni 2 June 2017 khan Faina (Sanitation) kawngah thawh-dunna thuthlung an lo ziak tawh bawk a, hemi hnuaiah hian kumin CYMA General Conference aṭangin YMA Branch fai lawmman sem ṭan beisei a ni.

Nimina thawhdunna thuthlung ziahna hi PHED E-in-C Pu Lalmuanzova chuan a kaihruai a, PHE Department hotute leh CYMA hruaitute an tel kim hle a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.