Chanchinthar Mizoram

PHE Department leh I&PR Department-ten awmze nei zawk leh ṭangkai zawka hma lak dan tur an sawiho

Nimin khan PHE Department Engineer-in-Chief pisa-ah PHE Department leh I&PR Department official ten mipuite rawngbawlsak kawnga awmze nei zawk leh ṭangkai lehzual zawka hmalak dan tur an sawiho.

Er. Lalmuanzova, E-in-C, PHED chuan inkawmhona hi kaihruaiin PHE Department hma-lakna leh hmachhawp chi hrang hrang te a sawi a, mipuite rawngbawltu pawimawh tak an nih avangin an rawngbawlsak mipui te nen inrintawnna leh thawhhona ṭha an neih theih nan an hnathawh leh hmalakna chi hrang hrangte an hriat-chian chu thil pawimawh tak ani a ti a, hemi tur atana I&PR Department ten hma an la chu lawmawm a tih thu a sawi a ni.

Nimin inkawmhonaah hian PHED hian Aizawl khawpui chhunga tui pipe an phum te chu a hma ami kum upa tawh tak aia ṭha zawk leh tlo zawk a thlak turin hma an la mek a, heng pipe phum thar te hi a hma ami anglo takin uluk takin an tuam vek zel a, kum rei tak puak keh lovin a hman theih tawh dawn a ni. Greater Aizawl Water Supply Scheme Phase-I hnuaiah nitin tui litre nuai 80 leh Greater Aizawl WSS Phase-II hnuaiah nitin tui litre nuai 150 an pump ṭhin a, tui pump nan darkar 24 chawl lova an thawh bakah an tui sem thianghlim leh thianghlim loh pawh uluk takin an endik reng zel a ni. Internet hmang thei te tan online in tui bill a pek theih tawh a, tunah hian mihring ek paih fai dan thianghlim leh him zawk “Septage Management” chu an zirchiang mek a, a hlawh-tlin chuan mipuite hnenah zirtir-na an pe chhawng leh dawn a ni.

Nimina inkawmhonaah hian awlsam zawk leh rang zawka mipuite hriat tur thil pawimawh thehdarh dan tur, PHED-in mipuite tana hma a lak chi hrang hrangte mipuite hriata pho chhuah dan tur leh Department hmalakna chi hrang hrangte mipuiten an hriatchian lehzual a, neitu nihna rilru an put theihna tura zirtirna tha zawk pek (Awareness/Sensitisation Campaign) dan tur te leh thawhho dan tur chi hrang hrang an sawiho a, he inkawmhonaah hian PHE Department aiawhte hi Er. Lalmuanzova, E-in-C-in a ho a, I&PR Department aiawhte hi Pi Lalnithangi, Director-in a ho a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.