Chanchinthar Politics

PRISM-in FIR/PIL an thehluhah Congress inrawlh lo tih chiang ti

Rorellai MPCC Media Department hruaitute chuan Mizoram Chief Minister hlui Pu Zoramthanga laka PRISM in FIR leh PIL case an theh luhah Congress Party an inrawlh lo tih a chian thu an sawi.

Inrinnia Aizawl-a chanchinbumite an kawmnaah Pu Zoramthanga hian kum 10 MLA a nih chhung leh kum 1998 atanga 2003 thleng Chief Minister a nih chhung khan Vantlang mit tikham kawpin eirukna thilah rinhlelh a kai tih an sawi a, Chief Minister a nih chhung leh a hnu ah pawh eirukna do pawl thenkhat leh mimal dikna duhtu ten amah chhui chiang turin ACB-ah FIR an thehlut tih an sawi a. Chief Minister hlui chu in leh lo leh rohlu tam tak nei-a puhin a fate hminga Life Insurance cheng vaibelchhe tel man chi lei-ah an puh bawk a ni.

Pu Zoramthanga hian tunah hian Court chi hnih – rorelna Court leh Mipui Court a hmachhawn mek a, Court chuan a tantir thei a, a chawi tir thei a, a pahnih pawhin a hrem thei tih sawiin, mipui Court-ah erawh chuan inthlan hunah vote hmangin mipute Pu Zoramthanga Case hi an rel fel sak dawn a ni an ti bawk.

May ni 23-a MNF-in milem biak dona kawngzawh huaihawt an tum chungchang sawi langin India ram hi sakhaw tihbik neilo ram a nih avangin sakhaw dangte serh leh sang zah sak hi ram hruaitu tihtur a ni an ti a. Chief Minister Pu Lal Thanhawla chu Mizoram hruaitu mai ni lovin ram pum huapa hruaitu-a pawm ni pha a nih thu an tarlang bawk a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.