Chanchinthar

Project tangkhang mek bawhzui dan tur sawiho

Chhan hrang hrang avanga Mizoram hmasawnna tur project tangkhang mek, chak zawka thawh a nih theih dan tur relin nimin khan Mizoram sawrkara Special Project Monitoring Committee  (SPMC) chu  an Chairman,  UD&PA Minister ni bawk Pu Zodintluanga kaihhruaiin Secretariat Conference Hall, New Secretariat Complex-ah  an ṭhukhawm.

He Committee hian Non Lapsable Central Pool of Resources (NLCPR) leh North Eastern Council (NEC)-a DPR tangkhang mek, hnathawhna tura sum la pekchhuah si loh, tang mek te dinhmun an thlir a. Kum 2006-2007, 2008-2009,  2009-2010, 2010-2011, 2012-2013, 2013-2014 leh 2014-2015 chhunga project retain hi NLCPR hnuaiah project 65, NEC hnuaiah project 10 a awm a ni.

Hnathawhna tur sum sanction tlai a nih chhan chhui chiangin Mizoram sawrkar mawhphurhna, department-te’n an tih tur tih loh an neih te a awm a nih chuan a rang lama ti fel tura hriattir an ni a, Project tang mek zinga a tam zawk hi chu sawrkar laipuia bawhzui ngai an ni.

Meeting hian project thawh tlak loh, thawh theih tawh loh,  project thuhmun (duplicacy) awm te leh DPR ennawn ngaite an sawiho a, heng zinga thenkhatte hi bawhzui tul lo a ngaiin tihtawp an rel a ni.

Special Project Monitoring Committee Chairman, Pu Zodintluanga leh Member Secretary, Planning Secretary ni bawk Dr. C.Vanlalramsanga te chuan heng project tang mekte bawhzui tur hian naktukah New Delhi an pan ang. Meeting-ah hian Parliamentary Secretary Pu Hming-dailova Khiangte bakah a kaihhnawih Department hrang hrang aiawhte an tel a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.