Chanchinthar Mizoram

State Rural Livelihoods Mission Governing Body ṭhukhawm

Mizoram State Rural Livelihoods Mission (MzSRLM) Governing Body meeting vawi 4-na chu nimin khan Rural Development Minister Pu R.Lalzirliana hovin Secretariat Conference Hall-ah an ṭhukhawm a, Mission hnuaia hmalak tawhna te thlir hovin kalpui zel dan tur an sawiho.

Meeting-ah hian an hmalak tawh chin chu zau takin sawiho a ni a, Self Help Group te zirchhiana (baseline studies) nei tura rawtna chu tha tiin kalpui nise tiin an rel a, Self Help Group hrang hrang te MzSRLM in khaikhawm se tih rawtna chu SHGs kalpui Department hrang hrang aiawh te nen sawiho nise an ti a. Non-Intensive Block 13-a SHG te tana training chu SIRD in buapui se tiin an rel bawk a ni.

National Rural Livelihoods Mission (NRLM) hi Sawrkar laipui-a Ministry of Rural Development in thingtlang mipui ten eizawnna ngelnghet an neih theih nan leh thingtlang-a mirethei te chawikan nan programme a kalpui mek Swarnjayanti Gram Swarozgar Yojana (SGSY) tun aia changtlung leh huap zau zawka kalpui a nih theih nana duan thar a ni a. Hemi zulzui hian state sawrkar zawng zawngte chu Mission dina bultan tura tih an ni a, Mizoram hi Hmarchhak biala a bul ṭan hmasa ber a ni.

MzSRLM thawhkhatna (Intensive Phase) kaltlang hian Kolasib District-a Thingdawl leh Bilkhawthlir RD Block leh Serchhip District-a leh Serchhip leh East Lungdar RD Block ah te bultan tum a ni a. Phase I (Non Intensive) chu District dang pali – Mamit, Champhai, Saiha leh Lawngtlai a Block 13ah te kalpui tum a ni bawk a, MzSRL Mission programme chu April ni 23 khian Chief Minister Pu Lal Thanhawla’n a hawng dawn a ni.

National Rural Livelihood Mission peng khat North East Rural Livelihood Project (NERLP) chu World Bank tanpuina in Hmarchhak bial bik ah Ministry of Development of North Eastern Region kaihhruaina hnuaiah state pali – Mizoram, Nagaland, Sikkim leh Tripura-a District pahnih theuh ah te kalpui tum a ni bawk. Mizoram ah chuan North East Rural Livelihoods Project hi Aizawl leh Lunglei District ah te kalpui tum a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.