Chanchinthar Mizoram

Sustainable Mountain Development Summit 2017 Organising Committee ṭhukhawm

Nimin khan Sustainable Mountain Development Summit 2017 Organising Committee chu Chairman Pu Zodintluanga UD&PA Minister hovin a pisa-ah an thukhawm a. Mountain Summit hi September Ni 20-22, 2017 chhunga Mizoram University-a neih tura ruahman a ni a. Summit hi Integrated Mountain Initiative (IMI) buatsaih niin Mizoram Sustainable Development Foundation chuan a thleng dawn a. Kumin Mountain Summit thupui tur chu ‘Climate Change’ leh ‘Sustainable Mountain Cities’ te a ni.

Organising Committee chuan Mountain Summit thlen tur chungchang inpuahchahna leh hmalakna hrang hrang an thlirho a. Meeting ah chuan Summit thlenna hmun atan Mizoram University thlan anih thu tarlan niin Summit chhimtute leh mikhual pawimawh tak tak te thlenna tur sawiho a ni a. Mountain Summit-ah hian parallel session neih tur niin Legislators (MP leh MLA)-te pualin intawhkhawmna “Legislators Meet”, Speaker Pu Hiphei-a kaihhruaina hnuaiah neih tur thu leh Chief Secretary Pu Lalmalsawma, IAS hovin CS Conference Hall-ah Policy Makers’ Dialogue neih anih tur thu tarlan a ni.

Sustainable Mountain Development Summit 2017, Aizawla neih tur hi vawi-6 na tur a ni a. Summit pual hian 6th Himalayan Photography Competition leh 1st Young Mountain Filmmakers Competition-te buatsaih a ni dawn a. Thalaite pualin Youth Summit bakah Networking Bazaar leh Media Worshop neih tur a ni bawk.

India rama Himalaya tlang bul thut state 12-te puala intawhkhawmna Sustainable Mountain Development Summit hi kum 2011 khan Uttarakhand-ah neih tan niin kumtin neih thin a ni a. Member State hrang hrang te chu- Jammu & Kashmir, Himachal Pradesh, Uttarakhand, Sikkim, Arunachal Pradesh, Nagaland, Manipur, Meghalaya, Mizoram, Assam, Tripura leh West Bengal-te an ni a. He Summit chhim turhianStatedang atangin MP, MLA leh Integrated Mountain Initiative (IMI) hmalakna a mi pawimawh tak tak te tel tura beisei an ni.

Mizoram Sustainable Development Foundation hi kum 2013-a din niin Integrated Mountain Initiative (IMI) hnuaia pawl pakhat a ni a. Summitah hian Himalaya tlang bul thut state hrang hrang hmasawnna turte, sik leh sa inthlak danglamin harsatna a thlente leh khuarel chhiatna laka inven dan bakah thil pawimawh dangte an sawiho dawn a.

Kum 2018 Mountain Summit chu Himachal Pradesh in a thleng dawn a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.