Chanchinthar Mizoram

Vawiin-ah ṬKP Day hmang dawn

Vawiin hi Ṭhalai Kristian Pawl (ṬKP) din champha phak vawi 62-na a ni a. Hemi ni hi Mizoram pumah TKP member ten an hmang dawn a ni.

Kumin ṬKP Day thupui atan “Khawvel eng in ni e” (Mathaia 5:14) tih hman a ni ang a, Headquarters aṭangin Progamme hman dan tur kaihhruaina siamin hemi zulzui hian Unit tinah hman a ni ang

A tirah chuan Ṭhalai Pawl din chu hlauhthawn an neih avangin Kohhran Upaten an phurpui vak lova. Tihsual palh hlau takin fimkhur leh uluk takin Serkawn Kohhran Upate chuan kan Zosap Missionary-te kaihhruaina hnuaiah kum 1951 July 30-zanah Serkawn ME School (tuna BHSS Junior)-ah ṭhalai ṭhahnem tak kalkhawmin, phur takin Ṭhalai Kristian Pawl chu an lo din ta a ni.

Kum 1952 Presbytery, Pukpuia neih chuan pawm-puiin Pastor Bial tinah din a phalsak bawk a. Hetih lai hian Mizoram chu Assam State hnuaia District ṬKP tih a ni a. District ṬKP Inkhawmpui hmasa ber chu Pukpuiah kum 1955 ah neih a ni a, he inkhawmpui ni hmasa zawk October 22 chu ṬKP Day atan hman a ni ṭhin a. Amah-erawhchu, hei hi dikhlel deuhva hriatna a lo awm a, kum 1995 MṬKP rorel Sethluna neih chuan Serkawna ṬKP din ṭan ni July 30 hi TKP Day atan hman ni se a ti a. Hei hi BCM General Committee chuan pawmpuiin kum 1997 aṭang chuan TKP Day hi July 30-ah hman a lo ni ta a ni. TKP te hi Pastor Bial 72-ah Unit 373 neiin, member 36,757 an awm mek a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.