Chanchinthar Mizoram

YMA Branch hrang hrangten YMA Day vawi 82-na an hmang

Mizoram chhung leh pawna YMA dinna hmun hrang hranga YMA branch-ten nimin khan Young Mizo Association (YMA) din champhaphak vawi 82-na chu nimin khan hmangin, he ni hi vantlang tana thil ṭha tihna ni-ah leh ṭanpui ngaite ṭanpuina ni-a an hman bakah he ni pual hian inkhawm leh intihhlimna hun te an hmang a ni.
Serchhip khawpui chhunga YMA Branch tam zawk chuan nimin zing aṭang khan khawtlang tana thil ṭha tia hnatlangin, ṭanpui ngai leh mi harsa te an ṭanpui a, intihhlimna hun huaihawt engemawzat an awm bakah branch ṭhenkhat, ruai nena lawm an awm bawk.

Sub Hqrs YMA Serchhip hruaituten branch hrang hrang ah hun an hmanpui a, President Pu RK Sanghmingthanga chuan chhunah lamah Hmar Veng Branch hmanpuiin, zanah IOC Branch-ah hun a hmang a, Pu R.Lalhmunsiama, Treasurer chuan Zote ‘S’-ah hmang-in, Asst. Secretary, Pu PC Vanlalluna chuan Khawlai-lungah a hmang a, Vice President, Pu R.Kawlthuama (Kawn-pui North) leh Pu Lalrammawia, Secretary (Chanmari Branch) te chu anmahni Branch-ah an hmang a ni.

YMA Day pual hian YMA Sub Hqrs. Serchhip chuan hmun hrang hrangah thilpek an sem a, District Hospital, Serchhip Poor-ah te, ARC, Chhiahtlang-ah te, Oldage Home, New Serchhip-ah te, Shalom Special School, New Serchhip-ah te, Unity Orphage Home, Hmar Veng-ah leh Zoar Urban  Deprived Children  Home, Dinthar-ah te Rs.2,000/- ṭheuh an hlân a ni.

Central YMA President Pu Lalbiakzuala chuan YMA puala a thuchah ah Mizo hnam hrang hrang te, kohhran leh hnam thliar lo a min phuar khawmtu YMA chu chawi sang zel turin YMA member te a sawm a, YMA chu tumah thliar hrang lo a tanpui ngai apiang tanpuitu anih angin, hlam chhiah a changkan san chi a ni loh thu sawiin, khawvel changkang zel ah kan hma lam huna YMA nihphung tur, a chhiat a that thu ah mitinin mawh kan phur tih hria a YMA thatna tur ngaihtuah chunga chawi sang zel turin mipuite a sawm a ni.

A tira Young Lushai Association tia vuah, YMA hi kum 1935 khan Zo Sap missionary te leh Mizo kristian hmasa te din a ni.

Editor
C.Lalrochhuanga, New Serchhip, Serchhip - 796181 Mizoram Contact: 8974286711
http://www.zothlifim.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.