Chanchinthar Zirna

Zirna In lian inzuar te zir chiang hmasa turin chah

Mizo Zirlai Pawl (MZP) chuan chuan Mizoram pawn lama zirna in lian, Mizoram chhunga rawn in zuarte chu ngun taka lo zirchiang turin zirlaite a chah a. India rama zirna in lian hrang hrangte chah chhuak a zirlaite tana Edu-Fest/Career Fair huaihawt thin te chu fimkhur tak leh zirlaite tana him tur zirna in chiah kawhhmuh thin turin MZP chuan a ngen bawk.

Nimina Aizawla MZP Executive Meeting chuan hemi chungchang hi sawiin, Zirlaiten awlsam taka zirna in sang zawk an hmelhriat theih nana mi ṭhahnemngaite hmalaknaa Edu-Fest/ Career Fair buatsaih a ni ṭhin chu MZP chuan ṭha a tiin, zirlaiten zirna an chhunzawm zelna turah nasa taka ṭanpuitu leh zirlaite tana kawng awlsam zawk kawhhmuhtu a nih ngei MZP chuan a ring tlat a ni, an ti a.

Amaherawhchu Edu-Fest/Career Fair kaltlanga zirna in lian rawn inzuar tam tak zingah Admission hmuh tam an duh luat avanga an inzawrh ang leh an intiam anga zirlaite tana hma la mumal lo zirna in tam tak an awm ṭhin erawh ṭha lo an tih thu sawiin, zirlaiten an zir chhunzawm zelna tur an thlan hma-in fimkhur taka zirchiang hmasaa admission ti chauh ṭhin turin MZP chuan zirlaite a chah a ni.

Zirna in hrang hrangte chu an mamawh dan a zirin heng – All India Council of Technical Education (AICTE) emaw University Grants Commission (UGC) emaw Medical Council of India (MCI) emaw Dental Council of India (DCI) emaw Nursing Council of India (NCI) etc. te pawmpui an ni em tih enfiah hmasa theuh turin MZP chuan zirlaite chu a chah bawk a ni.

MZP Meeting chuan Pre-Matric zirlaite tana Sawrkarin scholarship a semchhuah ṭhinah state sawrkarin a tum ve tur 25% a pek chhuah tlai ṭhin avanga zirlaiten a hun aia tlai a scholarship an dawng ṭhin chu pawi a ti hle a. Ministry of Minority Affairs-in a hun taka Pre-Matric zirlaite scholarship tur 75% a rawn pekchhuah theih laia Mizoram sawrkarin a tum ve tur 25% chu kum kal lai mek (session) chhunga a pek chhuah theih ṭhin loh avanga a kim lo a scholarship semchhuah a ngai fo ṭhin chu MZP  chuan ṭhalo a tiin, kum 2012-2013 chhunga Pre-Matric Scholarship atana state sawrkarin a tum ve tur leh zirlaite chanvo cheng nuai 325.25 chu a rang thei ang ber a pechhuak turin MZP chuan sawrkar thuneitute a ngen a ni.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.