Vawk pul hri African Swine Fever (ASF) avangin kumin hian state chhungah vawk 684 an thi tawh nia report a ni a, ASF vanga suat tawh zat chu 387 a tling a ni.
Tunlai khaw lum chho-ah ASF hri a leng chho leh a, ran damlo nei an awm a nih chuan Animal Husbandry & Veterinary Dept phone no 1962-ah Doctor-te biakrawn theih reng an ni tih AH & Vety Department Deputy Director Dr. M.Zo-hmingthangi’n a sawi a ni.
Dr. M.Zohminthangi chuan kum 2021 atang kumtin khawlum intan tirhin ASF hi a rawn hluar chhuak leh thin a ni, a ti a, thlasik laiin ASF chu zia deuh thin mahse nipui a lo inherchhuahin a hri chu a rawn pung leh thin a, Vaccine rintlak tak hmuhchhuah a la nih loh avangin mipuite chu fimkhur a pawimawh takzet a ni, a ti.
Animal Husbandry & Veterinary Department-in a chhinchhiah danin nimin khan African Swine Fever (ASF) vanga vawk thi zat chu 11 a ni a, vawk suat zat chu 56 a ni a, heng vawk thite hi Muallungthu-ah 4, Ramhlun Sports Complex-ah 1, Hualngohmunah 1, Dulteah 2 leh Khumtungah 3 a ni.
ASF vanga vawk thi zat hi kum 2021-22 khan vawk thi zat chu 33,417 a ni a, kum 2022-23 khan 12,795 a ni a, kum 2023-24 chhungin 1,139 niin, hetihian a vaiin ASF vanga vawk thi zat chu 47,351 a ni tawh a, Vawk suat tawh zat hi kum 2021-22 khan 12,568, kum 2022-23 khan 11,686, kum 2023-24 chhungin 980 niin, hetihian a vaiin vawk suat zat chu 25,234 a ni tawh a, vawk thi avanga tanpuina dawng chhungkua 2,488 an awm tawh a, AH& Vety Department chuan ASF vanga vawk chânte tanpuina tur cheng nuai 311.66 an dil mek bawk.
Tun dinhmunah Serchhip District-a ASF hri lenna hmun Khumtung khuaah chuan vawk 62 a thi tawh a, tarlan tawh thin angin Khumtung khua hi ASF hri lenna hmun, Infected Area-ah May ni 9, 2024 khan Serchhip District AH & Vety Officer, Dr. H.Vanlalrawna chuan a puang a, District Infected Area, Khumtung khua atanga vawk, vawksa leh vawksa atanga thil siam reng reng lakchhuah emaw, lakluh khap a nih thu a tarlang a, vawk thi reng reng paih mai lo a, chinai/disinfectant nen thûk taka phûm ngei tur a nih thu te, vawk talh leh vawksa zawrh khap a nih thu te, vawk thi an awmin, AH & Vety Department official-te hnena hriattir vat tur a nih thute a tarlang bawk.
Hei bakah hian April ni 24, 2024 khan Mizoram hmun thenkhat-ah African Swine fever (ASF) hrileng a awm leh avang leh khaw thenkhat chu Infected Area ah puan a nih leh tak avangin Serchhip District Magistrate David Lalthantluanga chuan Section 144 Cr.P:C 1973-in thuneihna a pek angin thla 2 awh turin Serchhip District chhungah ramdang (Foreign Countries) leh state dang leh district atanga Vawk, Vawk sa leh Vawk sa atanga thilsiam reng reng lakluh khapna thupek a lo tichhuak tawh bawk a ni.