Mizoram Sawrkar Flagship Programme Bana Kaih (Hand holding) Scheme hnuaia sawhthing lei leh hralh thawh khatna kalpui zawh a nih hnuah tunah hian sawhthing lei leh hralh thawh hnihna (2nd phase) chu Serchhipa kalpui leh turin Secondary Collection Centre (SCC) thenkhat chuan sawhthing leitu tur (Buyer) zawngin Auction an tichhuak leh tawh.
Serchhip District Bawrhsap, Paul L.Khuma, Serchhip District Agriculture Marketing Committee (DAMC) Chairman ni bawk chuan nimin khan sawrkar hmalaknaa sawhthing lei leh hralh kalpui dan chungchangah chanchinthar thehdarhtute chu Serchhip DC Meeting Hall-ah kawmin he thi hi a sawi a, District Bawrhsap chuan February ni 20, 2025 atanga sawrkarin SCC hrang hrang kaltlanga sawhthing a leinaah Serchhip District chhunga SCC pasarihah sawhthing Qtls. 8845.30 lei niin, heng sawhthing leina atan hian DAMC account-ah cheng vaibelchhe 5.2 thun a ni a, sawhthing hralhtu 1360-te bank account-ah an sawhthing hralhna man thunfel tawh a ni tih sawiin, heng sawhthing leikhawm tawh SCC atanga hralh chhuah lehna atang hian DAMC chuan cheng nuai 98.34 a dawng tawh tih sawiin, Lungpho leh Thenzawl SCC-ah sawhthing leikhawm sa hralh zawh loh a la awm tih a sawi a, sawhthing lei leh hralh thawhhnihna kalpui turin Serchhip leh Khawlailung SCC-te chuan sawhthing leitu tur zawngin auction an tichhuak tawh tih a sawi bawk.
Sawhthing lei thawh khatnaah chuan sawrkarin loneitute sawhthing Kg. 1 50/- zelin SCC-ah leisakin, SCC tinte chu an lei tur zat bituksak an ni a, sawrkarin lei tur zat a bituk aia tam leina SCC-te pawh a awm tih a sawi a, 2nd phase-ah chuan SCC-te chu anmahni inenkawl tura ruahmma siam niin, sawhthing leitu tur pawh SCC-in an zawng dawn a, sawrkarin reserve price a siam aia hniam lo-in a leitu turte hnenah hralh a ni ang a, reserve price hi Kg-ah22/23-ten sawrkarin a bithliah a, sawhthing an hralhna rate a zirin sawrkarin kg-ah cheng 50 a tlin lohna zat chu sawrkarin sawhthing hralhtute hnenah support price a pe thung tawh dawn a, Primary Collection Centre (PCC) atanga SCC-a sawhthing phurh thlen man chu PCC member-te tum tur a nih thu te, sawhthing chu SCC-a a leitu turte hnena hralh chhuah a nih hunah chauh bûk tur a nih thute a sawi bawk.
District Bawrhsap chuan SCC kaltlang lo-a sawhthing hralhtute chu sawrkarin support price a pe thei lo tih sawiin, tunhnai-ah pawh Zote South-ah hian mimal thahnemngaiin SCC kaltlang loin hnamdang hnenah sawhthing hralh turin an inbefel a, mahse sawhthing leitu turten an lei leh nghal mai theih si loh avangin sawrkar demna ang zawngin social media-ah thuthang a awm tih a sawi a, sawhthing chingtuten an duh chuan SCC kaltlang lo-in sawhthing an hralh thei dawn a, mahse SCC kaltlang loa sawhthing hralhtute hnenah chuan sawrkarin support price a pe thei lo tih mipuiten hria se a duh thu leh, thil hre chiang duh tan DAMC member-te zawtfiah mai tura a duh thu a sawi bawk.