Nimin (13.5.2025)-a Chief Minister Lalduhoma kaihhruaia Council of Ministers Meeting chuan Mizoram Engineering College-a hnathawktu post 63 lâkna tur a pawm.
Nimina Cabinet Meeting room-a Council of Ministers meeting chuan Higher & Technical Education Department atanga thu lût, ‘Proposal for creation of 63 new posts for Mizoram Engineering College, Pukpui, Lunglei’ chu a pawm a, kum 2019 khan Mizoram Engineering College hi Prime Minister chuan a lo hawng tawh a, amaherawhchu a panna kawng te, tui connection leh electric connection-te a la awm lo a, a taka function theih a ni lo a, sawrkar chuan a panna kawng leh connection pawimawhte tih nan cheng vaibelchhe 4.9 a sanction bakah, hnathawktu post 63 lakna tur a pawm ta bawk a ni.
Hei bakah hian Commerce & Industries Department atanga thu lût, The Draft Industrial Policy of Mizoram 2025 chu a pawm bawk a, Industrial Policy hi kum 1989, 2000 leh 2012-ahte siam a lo ni tawh a, tunlai mil tura tha zawk leh changtlung zawkin, investor-te hip leh zual thei turin Industrial Policy 2025 hi siam a ni.
School Education Department atanga thu lût ‘Proposal for amendment of Rule 3(ii) of Mizoram School Education Department (Terms and condition of appointment of teaching & non-teaching staff of provincialized school) Rules, 2023’ pawh telin, he rules 2023 hi Law Department-ten an zir chian hnuah India danpui (Constitution) kalh a ni an tih avangin a taka kalpui theih a ni ta lo a, a tih dan dang dap turin Council of Ministers hian a zirchiangtu tur Study Team a din a ni.
School Education Department atanga thu lût dang – Provisional Adhoc Grant-in-Aid School-a hlangkai tura tehna pha lote ngaihnatthiama dinhmun sang zawka hlankai theihna tur, ‘Proposal for upgradation of schools to Provisional Adhoc Grant-in-Aid School Edu and relaxation of the Mizoram Education (Provisional Adhoc Grant-in-Aid) Rules, 2024 so as to enable upgradation of schools that do not meet the required criteria’ pawh pawm a ni a, private school-ten school tihchangtlunna an hmuh theihna tura ngaihnatthiam theihna tur ‘Proposal for relaxation of the Mizoram Education (Lumpsum Grant-in-Aid for General Maintenance of Private Schools) Rules, 2024 for upgradation of various categories of schools to Lumpsum Grant-in-Aid’ pawh pass a ni bawk.
DP&AR atanga thu lut Mizoram Civil Services (Combined Competitive) Examination-a optional paper awm tawh lo tura rawtna pawh pawm a ni a, Provisional Employees Association hrang hrangte duh angin, PE-ten “The Mizoram Provisional Employee Saving Scheme, 2024’ an hman theihna tur pawh pawm a ni a, Aizawl Smart City Limited chu kum khat dang la kalpui tur leh, a tul anga ennawn zel ni se an ti bawk a, hei bakah hian Home Department atanga thu lut Directorate of Fire & Emergency Services hnuaia Station Officer (Level – 8) post pahnih chu Assistant Chief Fire Officer (Level – 10) post pakhat leh Divisional Fire Officer (Level – 10) post pakhata hlangkai tura rawtna pawm a ni a, dan siamthatna dang enge-mawzat an pawm bawk.