Council of Scientific & Industrial Research – Central Institute of Mining & Fuel Research (CSIR-CIMR) leh Maccaferri Environmental Solution Pvt. Ltd. atanga lo kal mithiam te, Aizawl District Disaster Management Authority (ADDMA) leh sawrkar department hrang hrang aiawhte’n nimin lama Pukpui, Lengpui kawng an endik hnuah nimin khan Er. Lalhriatpuia, Deputy Commissioner, Aizawl district-hoin Ngaizel leh Hlimena lung tlâk thinna leh lung tlâk mai hlauhthawnawmna hmun an endik a, khawtlang hruaitute’n an tawiawm a ni.
Mihring leh lirthei vei-vakte tana him lo hmunte an endik zawh hnu hian Chief Minister’s Conference Hall-ah Prof. Lalnilawma, Minister, Disaster Management and Rehabilitation Department-hoin hmalak dan tur ruahmanna sawihona hun an hmang zui a, he hunah hian K.Lalrinzuali, Secretary leh Lalrengpuia, Director, DM&R leh ADDMA member-te an tel a ni.
Pukpui, Lengpui, Ngaizel leh Hlimena lung tlakna leh leiminna hmun zirchianna chu Dr. Laldinpuia, Associate Professor, Mizoram University chuan PowerPoint Presentation hmangin a sawifiah a, Mathan Chauhan, Assistant General Manager, Maccaferri Environmental Solution Pvt.Ltd. chuan hmun hrang hranga leimin leh lungtla vên nana hma an lo lâk tawh dan tarlanna hun leh Aizawl chhunga hmun hrang hrang an endiknaa ruahmanna kalpui theih dante a tarlang bawk a ni.
He \hutkhawmnaa tarlan a nih danin Ngaizel kham phei km 1.7 a thui chu lung tlak hlauhawmna a nih thu leh chung zingah meter 405 chu ‘Very High Hazard’ a nih bakah meter 740 dang pawh ‘Vulnerable’ anga ngaih theih a ni a, chhinchhiah danin September ni 24, 2015 leh May ni 1, 2025 inkar khan lung tla avangin lirthei chhia 26, mihring inhliam 9 leh thihna tum 3 a thleng tawh a ni.
|hutkhawmnaah hian mithiamte chuan Ngaizel lungtlak thinna hmuna khâmte chu râwt zawl deuh (Re-slopping) te, tui pût awm nasa vên te, thirlên rintlak tak hmanga tuam a concrete-a phuh (Gunite) theih dante sawilan a ni a, khâm chunga chênna in engemawzata bawlhlawh leh tui chhe paihna mumal zawk siam leh lung kara thing zung lut tam tak suat pawh a tul tur thu sawi lan a ni bawk.