Nimin khan Serchhip Press Club-ah Serchhip District Information & Public Relations Office leh Mizoram Journalists’ Association, Serchhip District ṭangkawp buatsaihin Media Workshop neih a ni.
Kapliana Pachuau, Vice President, MJA (SD) kaihhruaia hun hmanah hian Lalnunmawii, MIS, Deputy Director, I&PR leh DIPRO Serchhip District ni bawk chuan ‘Traditional Media leh New Media’ tih thupui hmanga Vanneihtluanga thuziak a chhiar chhuah bakah MJA Member-te kal zelna tura thil ṭul leh pawimawh nia a hriat te sawiin, a theih chin china New Media (Internet rinchhan media) kalpui tel ṭula a hriat thu te sawiin, MJA member-te chu technology changkang chho zel mila inherrem leh hman thiam ve zel tum turin a fuih a ni.
Serchhip District MJA President C.Lalhminghlua pawhin Dr. H.Laldinmawia thuziak ‘Mizo ṭawng ziah dan dik’ tih chu chhiar chhuakin, Mizo ṭawng ziah dana ngaimawh thilte a sawi lang bawk.
Workshop-a telte hian heng thupui pahnih hi sawiho-in, an kal zelna tura thil ṭul nia an hriat rawtna hrang hrang te bakah Mizo ṭawng ziah dik lo leh dik zawka an hriat ṭhenkhatte sawiin, Journalist-te chu Mizo ṭawng ziak hnem ber leh chhiartu ngah ber an nih avangin Mizo ṭawng dika chanchinthar an ziah leh puanchhuah a ṭulzia an sawiho a ni.
He hun hmannaah hian MJA member thar Vanlalzarzova, Zawlbuk Aw Editor, Thenzawl lakluhna hun hman nghal a ni bawk.
Media Workshop hi I&PR leh MJA ṭangkawpin Aizawl leh District khawpui hrang hranga buatsaih tur niin, District ṭhenkhatah neih tawh a ni.