Mizo Students’ Union (MSU), Gen. Hqrs. chuan Mizoram sawkarin Unqualified Part Time Assistant Professor-te Contract a pawhsei sak duh lohna lantir nan nimin khan “Quality Education Humhalhna Kawng Zawh” an huaihawt a, hetihlai hian Education Minister Dr. Vanlalthlana chuan zirlai pawlten “Quality Education Humhalhna Kawng Zawh” an huaihawt chu lawmawm a tih thu a sawi.
Kawngzawh hi nimin chawhma dar 11 aṭang khan Vanapa Hall aṭanga Higher & Technical Education Directorate Office kawt thleng neih a ni a, he hunah hian college hrang hranga zirlaite an tel a, “Unqualified Assistant Professor sawr-karin a rawih luihte hi kan duh lo” tih leh ”Tling lo taka zirtirtu hna thawktute hi bang rawh se” tiin an au rual a ni.
He huna thusawitu zinga mi, MSU Vice President Roluahpuia chuan lungawi lohna lantir chu an tum ber a ni lo a, dawhkana sawifel mai theih a ni tih sawiin, thuneitute hnenah vawi engemawzat an thlen hnuah pawh awmzia a awm loh avangin lungawi lohna an lantir tih a sawi a. Kumin February ni 28-a pawhsei sak tawh lo tura sawrkarin order a chhuah tawh sût lehtu chu sawrkar tho a ni tih sawiin, sawrkarin kum 1 atan a pawhseisak qualify lo-te chu zirlaite zirtirtu atan an duh lo tih a sawi a, zirna in sâng bera Assistant Professor ni tur chuan Minimum qualification-ah NET a ni a, kum 1-ah NET vawi hnih exam a awm a, MA pass hlimte pawhin an paltlang theih paltlang theilote chu chhawr tlaka an ngaih loh thu an sawi a ni.
MSU Vice President chuan Kalphung thar tih au hla hmanga inthlan dawna inzuarte chuan kalphung hlui ang bawkin a ṭha lo tih hre reng si a rawih nawn tura ruahmanna an siam chu anmahni inzâwt lêt turin an duh tih a sawi a, ram leh hnam an hmangaih a nih chuan zirlaite zirtirtu atan a tling ngei te ruai turin an phut tih an sawi bawk.
Directorate Office kawta zirlaite punkhawm lai hian MSU hruaitute chuan Higher & Technical Education Director an kâwm a, sawrkar chuan tun thla July ni 3 khan heng zirtirtute hnenah hian tun thla July ni 18 thleng insawifiahna hun, show-cause notice an pe a, hemi hnu file kal hun ni 5 dang an nghak leh phawt dawn tih sawiin, Resolution lungrual takin an pass-naah sawrkar chu an thutiama ding tura an duh bakah tun hnua zirtirtu hna lakah Qualified teacher-te chauh lak ṭhin ni tawh se an ti a ni.
Hetihlai hian Education Minister Dr. Vanlalthlana chuan zirlai pawlte an harh thar zel a, kalphung thar sawrkar hnuaiah an thik thu pawh a chhia-in sawrkar hmalak mêkna thlâwp chunga Quality Education Humhalhna Kawngzawh an nei chu a lawmawm takzet a ni a ti a, ṭum 7 zet sawrkar hmasaten an pawhseisak tawh, tuna Part time-a thawk mi 29-te chu chhungkaw eizawngtu an nihnaah khawngaihna nen, sawrkarin an chungah rorelin a tawp nan hun a siamsak ve leh a, show cause notice pêk an ni tawh a ti a, zirlai pawlte kawng-zawh chhân bak pawh hi sawrkar chuan zirna siamṭhatna tur kawngah hma a la mawlh mawlh mek a ni, a ti.
Dr. Vanlalthlana chuan, tuna ṭuma Zirlai Pawlte Unqualified Part time-a thawk mi 29 an aupui bakah, College pangngai, Law College leh Mizoram Polytechnic Lungleia Unqualified Contract Asst. Professor-te pawh sawrkarin show cause notice a pek vek tawhte an ni a ti a, sawrkar hmasa lama an chai tam loh, Aikal lak chungchangahte pawh zirlai pawlte an ṭawng chhuak ngam ta chu a lawmawm tak zet a, zirtirtute attendance check ngam soawrkar a ding ta a, Kai App siam a ni bawk a ti a, sikul zirtirtute pawh an kal ṭhat phah a ni a ti.
Education Minister chuan, MTET nei lo MR Teacher tam tak te pawh last chance pek mek an ni a ti a, Samagra Shiksha hnuaia unqualified teacher awmte pawh zawn chhuah mek an ni a, dân laka sawrkar himna turin uluk takin engkim zirchian a ni a, hemi nghak zo lo hian zirlai pawlte chuan kawng an zawh ta a, an duh angin a tih nghal vek theih loh a, sawrkar chuan hma a la zel dawn tih erawh hria se a ti a. Hun inpe lova mi chaw bel ben buaksak hi sawrkarin a duh loh avangin, dân zuiin sawrkar chu a kal mai a ni, a ti a. Minister chuan, “Kum 2019-a lak, MR teacher 800 chuang zingah qualified lo mi 100 chuang an awm tih sawiin, qualified tam tak an awm tawh avangin tunah hian sawrkarin last chance a pe leh mek a, sawrkar hmasa khan kum 2024 thleng an qualify ve theihna turin hun an pe a, heti a nih chuan MR teacher ṭhenkhat, lehkha zir mekten an tuar nghal dawn a ni a ti.