Chakma Autonomous District Council-a thuneihna inchuhna karah Mizoram Governor chuan Chakma Autonomous District Council thuneihna chu thla 6 chhung atan lâksakin, Lawngtlai District bawrhsap chu CADC enkawl turin a ti.
Chakma Autonomous District Council-a BJP hruaitu, CEM Molin Kumar Chakma chu June ni 16 khan No-Confidence Motion hmangin CEM aṭanga paih-thlak a ni a, motion hi Zoram People’s Movement (ZPM) member, Rengkashya bial aṭanga MDC thlan tlin, Doymoy Daveng Chakma chuan a pu lût a, CEM Molin Kumar Chakma hian sawrkarna chelh chhun-zawm turin member a ngah tawk tawh lo a, hruaitu thlak danglam ngai a nih thu a sawi.
Session-a tel Elected Member 17 zinga MDC 15 chuan motion hi an thlâwp a, MDC pakhat chuan motion thlâwp lo zawngin a vote a, MNF, MDC awm-chhun, Rasik Mohan Chakma chuan vote a thlak lo a, BJP hruaitu, CEM paih duhtu an tam zawk vangin, CEM chu paihthlak a ni ta a ni.
May 2023 khan CADC-ah hian inthlanpui neih niin, MNF hruaitu CEM atan Rasik Mohan Chakma lakluh a nih hnuah, kumin February ni 27 khan BJP hruaitu, Molin Kumar Chakma chuan a thlak a, CADC-ah hian thlan tlin member 20 awmin, member pakhat thi ta ai thlan a nih loh avangin tun dinhmunah member 19 an awm mek a, ZPM-in member 16 neiin, MNF member 1 leh BJP Member 2 an awm mek a ni.
CADC-ah hian ZPM chuan an hruaitu Lakhan Chakma hoin sawrkarna siam tumin theihtawp chhuah mahse Governor hian state sawrkar a biak-râwn hnuah CADC thuneih-na hi a laksak ta a ni.