Serchhip District Magistrate Paul L.Khuma chuan Serchhip Mat phaia nul leh thlai hmun siama eizawng ṭhinte zawm tur thupek a tichhuak.
District Bawrhsapin thupek a tihchhuahah chuan Serchhip Mat phaia nul leh thlai hmun siam ṭhin mi ṭhenkhatten Pangang hlo (pesticide) fimkhur lo takin an hmang ṭhin tih hriat a nih thu te, mi ṭhenkhatin zu leh ruihtheihthil siamna remchanga an hman ṭhin bakah ramngaw leh nungchate tichereu zawngin hma an la ṭhin tih report dawn a nih thu a tarlang a, hengte hian mipui vangtlang hriselna a nghawng theih thu leh, mipuite tan hnawksak a nih theih bakah harsatna lian tak a thlen theih avangin Section 152 of BNSS, 2023-in thuneihna a pek angin thupek a tichhuak tih a tarlang.
Thupekah chuan Serchhip Mat phaia nul leh thlai hmun siama eizawng ṭhinten ramngaw leh nungchate tichereu zawngin hma an la tur a ni lo tih a tarlang a, thlai hmun siam leh nûl siam chu zu leh ruihtheihthil siamna remchangah hman tur a ni loh thu te, Pangang hlo (Pesticide)-te fimkhur takin an hmang tur a ni tiin, pesticide an hman aṭangin thlai lâk hun tur dik takah an thlaite an seng tur a ni a ti a, nul leh thlai hmun nei/enkawl ṭhinten midang tan harsatna an thlen tur a ni lo a ti bawk a, thupek zawm lo chu Section 223 of BNS, 2023 dan hmangin hrem theih an ni tih a tarlang bawk.
Pic: Elisian Sailo