Serchhip khawpuia bawlhhlawh thliar hran leh sawngbawl chu August thla aṭangin a taka kalpui ṭan tum a ni a, a bul ṭanna (pilot) atan New Serchhip thlan chhuah a ni a, niin khan khan Serchhip District Bawrhsap Paul L.Khuma-hoin New Serchhip area-a Village Council leh tlawmngai pawl zawng zawngte koh khawm an ni.
Nimina hemi chungchanga inkohkhawmnaah hian Paul L Khuma chuan bawlhhlawh sawngbawl kawngah Serchhipin bung thar a kai dawn a, chumi tihhlawhtlinna tur chuan a bul ṭan nan New Serchhip thlan an ni, a ti a, mi tlêmte rorel, mipuia barh tumna ni loin, huam zau taka inrâwnkhâwma he hmalakna hi kalpui tum a nih avangin New Serchhip area-a VC member zawng zawngte leh tlawmngai pawl awm apiang te, an zavaia koh khawm an ni tih a sawi a, bawlhhlawh sawngbawl kawnga hmalak an tum dan hi mipuiah chiang taka hrilhfiah a, inhriatthiam lohna leh dodalnate a awm lohna tura zirtirna ṭha pe turin kalkhawmte a ngên a, mipuite tel loin he hmalakna hi engti kawng zawng maha a hlawhtlin theih loh avangin, thawhhona ṭha tak nen, mi dangte tan pawha entawn-tlak tura he hmalakna hi tihhlawhtling turin Paul L Khuma chuan New Ser-chhip mipuite a ngen a ni.
Serchhip District thuneitute kaihhruaiin Serchhip District Urban Development Office, Public Health Engineering Department (PHED) leh Greenherd Pvt. Ltd.-te chuan bawlhhawlh sawngbawlna a takin Serchhipah kalpui ṭan an ṭum a, he hmalakna hian Serchhip khawpui pumpui a la huam dawn a, a bul ṭanna atan New Serchhip thlan chhuah niin August thla tir aṭangin New Serchhip huam chhunga chêngten anmahni in ṭheuhah an bawlhhlawhte an thliar hran a ngai tawh dawn a ni.
Nimina inkohkhawm-naah hian Addl DC Lalrinzuala, DUDO Gaston Vanlalhriatpuia, New Serchhip North leh South VC, YMA, MHIP leh MUP hruaitute an tel a ni.