Sairang leh Kawnpui inkar NH 306 kawngchhia vangin lirthei ṭhahnem tak a tangkhang mek a, hetihlai hian Mizorama truck neitute chuan kawng chhia avangin lirthei tlantir ai chuan dintir a hlawk zawk niin an sawi.
NH 306 kawngchhia vang hian nimin leh niminpiah khan khan lirthei tangkhang 500 chuang a awm a, kawng siam hna NHIDCL-ten an thawh avangin Aizawl SP thuchhuah angin zing dar 9 aṭang tlai dar 5 inkarah lirthei lian tlan phal a ni rih lo bawk a ni.
Hetihlai hian Mizoram Truck Owners’ Association General Secretary Dina Tlau chuan kawng chhia avangin lirthei tlantir aiin dintir a hlâwk zawk tia, an lirthei dintir an tam tawh thu a sawi a, Mizoram châk lâkna kawngpui, Sairang leh Kawnpui inkar chu ṭha lai a awm meuh lo tih sawiin, Sairang pelh hret, Buichali nena inkar chu a chhiat zual thu a sawi a, lei pawp leh rod lawr thlenga a awm thu leh heng hian an lirthei ke a tihpuah nasat thu a sawi a. Kawng chhia avanga traffic jam a nasat ṭhin thu sawiin, zinga driver-te chhuk thla chu nilenga tângin zanah an tlaivâr ṭhin thu leh a tuk tlaiah an chhuah theih ṭawk ṭhin thu a sawi.
Kawng chhia avangin mi tam takin lirthei dintir a hlâwk zawk an tih thu sawiin, tam takin an dintir thu a sawi a, kawng siam chu NHIDCL aṭangin a hminga mi tlêm azawng an awm ve nia an hriat thu sawiin, hna a sâwt loh thu sawiin, phai aṭanga bungraw lût tur pawh a luh hleih theih loh thu a sawi.
Dina Tlau chuan tun maiah chuan kawng siam hna thawktu NHIDCL an ngaihchan thu sawiin, kartawp lamah a hmuna kal an tum thu a sawi a, an kalchilh chuan kawng siam hna pawh a sâwt deuha ṭhina an hriat thu a sawi bawk.