Kawnpui leh Sairang inkar kawng chhe zualpui hnawh nan sawrkarin cheng nuai 100 a ruahman a, nizan atang khan hna thawk tan nghal turin ruahmanna siam a ni.
Nimin khan Chief Minister Lalduhoma hoin Mizo-ram kawng chhe chungchang sawihoa thutkhawm a ni a, he hunah hian PWD Minister Vanlalhlana, PWD hotute leh Finance Department hotute an tel a, Kawnpui – Buichali – Sairang kawngpui chu NHIDCL kuta awm, state sawrkar mawh-phurhna ni tawh lo mahse, nitin châk lâkna pui ber a nih avangin nikum lama sawrkarin a lo hnawh tawh angin, kuminah pawh a zualpui hnawh leh mai ni se, an ti a, hnathawh nan cheng nuai 100 an ruahman nghal a ni.
Darlak – Tuidam inkar kawng chu a kawng thar zawk sialtu contractor-te an tlakchhiat avangin an contract tihtawp loh theih lohin an awm thu thutkhawmah hian tarlan a ni a, Tender thar chhuah dilna central sawrkarah a awm mek thu leh he dilna hi chak taka ûmzui mek a nih thu tarlan a ni a, a hêlna kawng hlui, tuna hman mek chu PWD lamin a zualpui lo thawm tha se tiin an rel a, cheng nuai 20 an ruahman a ni.
Chief Minister hoa Mizoram kawng chungchang thlirhonaah hian kawng chhe thawm tura an relte bawhzuitu tur Coordination Committee, Secretary PWD kaihhruaina hnuaiah din a ni a, anni hian hmanraw mamawhte lakhawmin nizan atang khan hna an tan tura tih an ni a, NHIDCL lam pawh na zawka nawr ni se, central sawrkarah pawh a tul anga hriattir ni se tiin an rel bawk.
Thutkhawmah hian Mamit – Bairabi kawngpui chu a grade a tha na a, khuar erawh a tam rih thu tarlan a ni a, he kawngpui hi hman theiha a awm reng theih nan a tul lai apiang thawm that ni se an ti a, he kawngpui hi engemaw thulha Kolasib lam kawng-pui a lo pin pawha hman theih niin a thawmthat nan cheng nuai 65 pek chhuahn se tiin an rel bawk a ni.
Hetihlai hian Mizoram Oil Tanker Drivers’ Association (MOTDA) President Romel Lalruatdika chuan kawng chhia avanga an tuialhthei phurh an chawlhsan chu la chhunzawm zui ni se an ti tih a sawi a, MOTDA hian kar kalta Zirtawpni khan thuchhuah siamin Kawnpui atanga Sairang inkar kawng chhia chu Oil Tanker tlan nan a him loh avangin kawng chhia hi tlan theih pangngaia siam a nih hma chuan an lirthei dintir an tum thu an sawi a ni.
MOTDA President Romel Lalruatdika chuan Thawhlehni hian kawng chhia chu a hmunah an pawl hruaituten tlawh an tum naa Fak Hlawh Lo Val Rual pawlten kawng chhia chungchang sawiho turin pawl hrang hrangte an kohkhawm avangin an tlawh thei rih dawn loh tih a sawi a, pawl hrang hrang kalkhawmin an rorel azirin an awm dan a danglam theih thu a sawi a, hetihrual hian tun dinhmunah chuan tlan theihna tura kawng siam that a nih hma chu din rih an la tum thu a sawi a ni.