Chief Minister Lalduhoma chuan nimin khan khawvel hmun hrang hranga cheng Mizote inthlunkhawmna tur internet portal thar Mizo DiasporaHub a hawng.
Mizo Diaspora Cell-ten LushAITech nena tangkawpa an siam, internet portal thar Mizo DiasporaHub hawnna inkhawm RB McCabe Hall, Aijal Club-a neihah Chief Minister chuan tunlai thiamna hmanga mipui leh sawrkar indawr-tawnna lama sawrkar hma-lakna hrang hrangte a tarlang a, CMO-ah ngei pawh awlsam zawka document dah that a, an duh huna an hai chhuah leh zung zung theihna cloud based filing system an hmang der tawh tih a sawi.
Lalduhoma chuan khawvel ram hrang hranga awm, Zofate nena inthlun-zawmna tha neih chu an rilruah a thi thei lo tih sawiin, an sawrkar veleh chumi lam hna thawktu tur Mizo Diaspora Cell chu Chief Minister Office-ah an din ta tih sawiin, a tir lamah ram pawna tangkhang tanpui ngaite an theih ang angin an tanpui a, inthlunkhawmna lam an buaipui leh a, chu an hmalakna rah chu Mizo DiasporaHub tiin an lo hawng thei ta tih a sawi a ni.
Vanlaldina Fanai, Chairman, Diaspora Cell chuan Mizo DiasporaHub chungchang sawiin, tunah hian welfare/association tan registration hawn mek a ni tih sawiin, he mi zawh hian mimal registration hawn leh a ni ang a, he portal hmang hian miin a va vahchhuahna hnai vaia Mizo Welfare lo awmte awlsam takin a hre thei dawn a, an inkhawmna hmun te, an pawl hruaitute contact pawh a hre thei dawn a, AI hmanga thuam niin, zawhna pawh zawh theih tih a sawi a, rikrum thila thu inthawnna tur SOS chenin dah a ni, a ti a, China rama zirlai tangkhang mek leh Cambodia lama harsat-na tawk mek te tana an hmalakna mekna tlangpui pawh sawiin Ministry of External Affairs te nena tangruala an bawhzui mek thu a sawi
He hun hmanah hian ICT Minister Dr. Vanlalthlana, Social Werlfare Minister Lalrinpuii, LESDE Minister Lalnghinglova Hmar-te bakah Adviser to CM te, official te, tlawmngai pawl hruaitu te, Diaspora Cell member te, LushAITech thawktute an tel a ni.
He portal thar hi play store leh apps store atanga download theih a ni a, Website atanga luh theih a ni bawk.