Ruihhlo ngaite chhan-chhuah nana buatsaih Hulhliap Short Stay Centre thawh hnihna chu nimin atang khan kalpui tan leh a ni a, mi 150 awmna tura ruahmanah mi 550 vel an lut.
Hulhliap Core Committee hnuaia Task group on Public Relations hotute sawidanin, Hulhliap thawh hnihnaa lût turte hi nimin chawhma dar 9 bawr vel atang khan Synod Revival Camping Centre, Sihphir Neihbawiah an inziaklut tan a, Aizawl chhung atanga lût turte chu CYMA Office, Tuikhuahtlang leh Bawngkawn YMA Hall-ah innghak khawmin Camping centre hi a huhoa panpui an ni a, Aizawl district pawn atangin mi thahnem tak chu Centre-a lut tur hian an in ziak lut bawk.
Ruahman dan chuan batch tinah hian mi 150 zel enkawl tura tih a ni a, hetihlai hian Hulhliap thawh hnihnaa lut tur inziak lut hi an thahnem hle a, nimin tlai dar 5:30 vel thleng khan mi 550 an inziak lût tawh a, a thawh khatnaah pawh khan a tirah mi 250 vel camp-ah an lut a, awm tluan erawh mi 119 an ni thung.
Hulhliap Short Stay Centre thawh hnihna hi July ni 21 atanga August ni 9, ni 20 chhung kalpui tura ruahman a ni a, Campers-te chu July ni 21 atanga ni 30 thleng an taksa-in ruihhlo a mamamawhna zualpui phuhruk thei turin damdawi lam thiamna hmangin enkawl an ni ang a, July ni 30 atanga August ni 3 thleng rilru lam enkawl thiamten Counselling an neihpui leh ang a, hemi hnuah Synod Revival hnuai Gospel team-ten August ni 9 thleng Gospel Camping neihpui leh tura ruahman a ni bawk.
Hulhliap Short Stay Centre hi Mizoram Sorkar, Tlawmngai Pawl leh Kohhran tangkawpin an buatsaih a ni a, nakum March thla thleng kalpui tura ruahman niin, Synod Revival Camping Centre, Neihbawiah Camping hi kalpui thin a ni a, a thawh khatnaah khan mipa leh hmeichhia enkawl an ni a, a thawh hnihna erawh damdawi hmang sual mipa hlang tana buatsaih a ni.