Nimin khan GP Singh, Chief Engineer, Project Pushpak, Border Roads Organisation (BRO) chuan Larsap, General (Dr) Vijay Kumar Singh, PVSM, AVSM, YSM (Retd) chu Raj Bhavan-ah hmuin, ram venhim hna leh inkalpawhna tha siam kawnga Mizorama Pushpak hmalakna leh hmachhawpte bakah rawtnate Larsap hi a hrilhfiah.
Larsap chuan Project Pushpak hnuaia project hrang hrangte leh rawtna thlente chu pawimawh a tih thu sawiin, chak zawka hmalak a nih theih nan Central leh State sawrkar thuneitue hnenah a tul anga bawhzuia, approval leh funding a awm theih nana hmalakpui a tum thu a hrilh a ni.
He hunah hian project pawimawh tak tak 6 te tarlan a ni a, Kawnpui – Durtlang – Aizawl (K-D-A) Road tihchangtlung a pawimawh thu leh MHA lama fund bawhzui chak a tul thu te, IMB (MHA) Road work leh Fencing Work-te tan thei tura hemi kaihhnawih Land Acquisition (LA) leh Forest Clearance (FC) case-te chinfel thuai a tul thu te, Kawlchaw – Serkawr – Tuipang Road siam tura rawtna thlen a nih thu leh state Sawrkar atanga No Objection Certificate (NOC) nghah mek a nih thu te, Old Tualcheng – Pamchung Road sanction fel tawhah State sawrkar atangin K-D-A road nena inthlakthleng awm lo tura NOC ngaihchan a nih thu leh DC atanga hnathawh phalna dil a nih thu te, Kaladan Multi-Modal Transit Transport Project (KMMTTP) hnuaia package, 71 RCC (GREF), Lawngtlaite thawh tura pek chungchang leh hei hian hnathawh a tihchak phah dawn thu leh vilzui a awlsam phah dawn thu te, Aizawl Bypass hnuaia package thenkhat Pushpak/BRO kuta hlan chungchangte sawifiahin Larsap hnenah an thlen a ni.