Chief minister hlui Zoramthanga thah tuma puh, social media hmanga vautu nia hriatte chu finfiahna tha tawk a awm loh avangin court-in a chhuah.
Aizawl district-a judicial magistrate first class chuan he thubuai-ah hian Nilaini khan thutlukna siamin CM hlui thah tuma social media kaltlanga vauna ziaka puh Rodinliana (39) Khawzawl Hermon veng leh Chanchinmawia (49) Hnahthial Lungleng vengte chu a chhuah zalen a. Cybercrime Police Station Aizawla mi he thubuai chhui chiangtute thil hmuh dan leh thuhretute bakah CM hlui thaha vautute thusawi a ngaihthlak hnu-ah judicial magistrate chuan rinhlelhna awm mahse, rinhlelh rual loha an tih ngei a ni tih finfiahna a awm theih loh avangin thil tisualtu a puhte hi a chhuah ta a ni.
Kum 2022 March ni 11 khan Facebook Zoram Politics Group-1 ah mi pakhat chuan khatihlaia CM Zoramthanga chu thaha a vau avangin hemi kum vek April ni 12 khan Aizawl a Cybercrime Police Station-ah FIR thehluh a ni a. Cybercrime Police station a thawkte hian an chhui nghal a. Facebook-a an ziah dan chuan lehkhathiam mi 5 intelkhawmin silai kap thiam an rawih thu leh CM chu hmasawnna hna tithanthutua puhin thla 3 chhunga a nihna a bansan loh chuan an thah tur thu an ziak a ni.
Cybercrime Police-te chuan Google leh Facebook law enforcement team hnena atanga finfiahna awm thei la chhuakin an chhui zui a, an chhuinaah hian Rodinliana chu manin a mobile phone pawh chhuhsak a ni a, Rodinliana thurualpui nia hriat, Facebook-a ‘CC Azyu’ tia hming invuah nia rinhlelh Chanchinmawia chu man leh a ni a, an mi man pahnihte erawh chuan hei hi an tih a nih loh thu sawiin an pha a ni.