Rural Development Minister Prof. Lalnilawma chuan ni 100 inhlawhna MGNREGA chu dik taka kalpui turin National Mobile Monitoring System (NMMS) hmangin hnathawktute leh hnathawh endik a ni tawh dawn a ti.
He thu hi nimina a pisa-a chanchinbumite a kawmnaah sawiin, Minister chuan ni 100 inhlawhna hnuaia hnathawkten a tak taka hna an thawk tih lantirna, Mobile phone application National Mobile Monitoring System tia a hming an vuah hmangin hnathawh tan tirh leh bân dawnah thlalak a ngaih tawh tur thu a sawi a, hnathawh tan tirha thlalaka langte chu tlai lam hna-thawh bân thlalaka an kim lo emaw, a ngai vek an lang lo a nih chuan sawrkar laipui dân thar zamin hnathawk lo anga a lantir dawn thu a sawi a, hlawh pawh hetiang a nih chuan beisei tur a awm loh thu a sawi bawk. Hetianga sawrkar laipuiin dân an rawn zam tak avang hian minister chuan MGNREGA kaihnawih sawrkar hnathawk leh a chhawrtu VC leh mipuite fimkhur leh uluk lehzuala kal tura a duh thu a sawi bawk.
Prof Lalnilawma chuan Job Card hi chhungkaw khatah pakhat chauh neih phal a ni a ti a, chhungkaw thuhmun atanga job card pakhat aia tam neih tumten Ration Card an thendarhtir thin tihte pawh hriat a ni a, chhungkua, in danga chêng an nih loh chuan job card hi chhungkaw khat atangin pakhat zel bak a neih theih loh tih hriat nawn leh ni se a ti a ni.
Sawrkar laipuiin, ni 8, July 2025-a State tinte hnena lehkha a thawnah chuan village level-a ni 100 inhlawhnaa Muster Roll-a attendance leh thlalak upload-te chu an inhlawh ni tlai bân la la-in, zaa za-in a dik em tih an check vek a ngai a, chutiang bawkin Block level-ah BDO leh a staff-ten, Muster Roll-a thlalak leh attendance-te chu inhlawh zawh ni tukah 20% tal emaw, thlalak leh attendance 200 tal an check a ngai a, District level-ah pawh Project Director-in thlalak leh attendance 100 tal emaw, 10% emaw tal a check a ngai a, Project Director hnuaia staff-ten thlalak leh attendance 200 tal emaw 10% tal an check a ngai bawk a, chutiang zelin State level-ah Commissioner-in thlalak leh attendance 20 a check a ngai a, RD hnuaia permanent staff leh Contract Staff-ten 200 ve ve tal emaw 5% tal an check chhuah vek a ngai bawk a. Hnathawh tan tirha thlalak leh tlai bân dawna thlalakte a inan loh chuan, lo pawm mai kha a ngam awm ta lo a, thlalak dik lo leh attendance dik lo, lo pawmtu an awm chuan, a pawmtu khan mawh a phur tawh dawn a, dan anga hrem mai tur tiin sawrkar laipui chuan state-te a hriattir tih a sawi a, khawi State mah ngaihnatthiamna (exemption) pek an ni dawn lo a, dik lo taka hnathawk leh attendance capture thinte lakah pawh ngaihnat-thiamna awm lo (Zero Tolerance Policy) kalpui tur a nih thu leh, hre reng chunga tisualtu chungah na taka action la turin state zawng zawng a rawn hriattir tih a sawi bawk.
Minister chuan kumin sawrkar tangka kum kal mekah sawrkar laipuia Rural Development ministry chuan ni 100 inhlawhna atan Mizoram sawrkar chu cheng nuai 35,326 wage component atan a ruahman sak tawh thu leh, material component atan `2,207 an hmuh tawh thu a sawi bawk.