Serchhip District chhunga thingtlang khua zawng zawngah bawlhhlawh thliar hran kalpui a ni dawn a, nimin khan Serchhip District Bawrhsap Paul L. Khuma-hoin DC Pisapui Hall-ah bawlhhlawh sawngbawl dan chungchangah inrawnkhawmna hun hman a ni a, PHE Department buatsaiha hun hmannaah hian Serchhip District chhunga WATSAN Chairman leh Secretary-te an tel a ni.
Paul L.Khuma chuan faina leh thianghlimna kawngah hma sawn a nih theih nan, khawtlang tana tha rel turin inrawnkhawm-na hun buatsaih a ni tih sawiin, an khaw aiawha khawtlang hruaitu lo kalten ngaihdan tha tak tak an neih ngei a beisei thu a sawi. Thingtlang khuaah bawlh-hawlh sâwngbâwl kalpui tan a nih dawn tak avangin khawtlang hruaitute an pawimawh tak zet dawn, a ti a, mipui mimir tel loin a hlawhtling thei lo tih hriaa mahni khua theuhah an thil zirte hawn a, an khaw mipui-te thinlung hneh tum theuh turin a fuih a, bawlhhlawh tihtlem kawnga tan la turin Serchhip District mipuite a ngen a, a theih chin chinah bawlhhlawh neih tlem (reduce), hman nawn (reuse) leh thil dang siam nana hman tangkai (recycle) tum turin a fuih a ni.
PHED leh Green Herd SP-te thawhhonain Serchhip District chhunga thingtlang khua zawng zawngah bawlhhlawh thliar hran a nih dawn bakah Green Herd SP-te hian bawlhhlawh an khawn tawh dawn a, bawlhhlawh phur motor tlan dan tur pawh ruahman fel a ni tawh a ni.
Nimina inrawnkhawm-naah hian khaw hrang hranga bawlhhlawh sawng-bawl dan tur inhrilhhriatna awareness campaign neih dan tur te, bawlhhlawh dah khawmna hmun tur leh khawn dan tur te, bawlh-hlawh sawngbawlna man chungchangte sawiho a ni a, Awareness campaign hi khaw tinah neih tha tih niin, VC lamin Gram Sabha koin a tul angin PHE Department lamten an telpui ang a, Sanitation fee thla tin Rs.50 lak ni se, Sanitation point hi Green Herd SP leh VC-ten ruahmanna an lo siam ang chu rin phawt ni se, a tul angin siamthat ngai siamthat leh ni se tiin an rel a ni.
Addl. DC Lalrinzuala kaihhruaia inrawnkhawmna hun hmannaah hian Er. Lalropuia Hmar, Director PMU, PHED Mizoram chuan Solid waste management chungchang sawifiahin, PMU Consultant, Green Herd SP leh PHED Serchhip aiawhten thu an sawi bawk.