Mizorama raltlan awmte kutzia leh mitnaute lâkkhawm hna chu Serchhip, Lunglei, Champhai leh Hnahthial district-ahte kalpui tan a ni tawh.
Serchhip district-ah chuan Nilaini atang khan Myanmar leh Bangladesh atanga raltlante biometric enrolment hi tan a ni a, SDO (Sadar) Rebecca Laldinmawii Hrahsel sawidanin July ni 30 khan Serchhip Chanmari VC huam chhunga Myanmar raltlan awmte kutzia leh mitnaute thla lâkkhawm hna hi tan a ni a, hna hi chawlhsan leh rihin, kar leh Thawhtanni leh Zirtawpni-ah chhunzawm leh a ni ang. Serchhip district-ah hian veng leh khaw 30-ah raltlan an awm a, Myanmar raltlan hi mipa puitling 198, hmei-chhia 150 leh naupang 299, an vaiin 647 an awm anga chhinchhiah a ni a, Thenzawl khawpui bikah Bangladesh raltlan mipa puitling 75, hmeichhia 73 leh naupang 118 awmin an vaiin 266 an awm a, Serchhip district-a raltlan awmte hi relief camp-ah awm loin an chhungkhat laina leh thiante bel deuh vek an ni a, mi in luaha khawsa an awm bawk.
July ni 30 vek khan Lunglei district-ah pawh Myanmar raltlan 70 chuang awmna Ramthar camp atangin an tan a, nimin khan zawhfel hman an beisei chungin thenkhat Aizawl lama sikul kalte erawh chu hun remchanga bawhzui leh tura dah a ni a. Kar leh lamah chhunzawm chhoh zel tum a ni. Lunglei district-ah hian Myanmar raltlan hi 1,991 an awm nia chhût a ni.
Myanmar raltlan awm tam berna Champhai district-ah chuan Ningani khan Champhai khaw chhunga VC 3-ah biometric enrolment hi tan a ni naa, khâwl a chiangkuan loh avangin a takin an kalpui thei meuh lo a, nimin lamah pawh khawl a \hat loh avangin chhunzawm theih a ni lo. Champhai district-ah hian raltlan hi mi 13,586 an awm mek nia chhinchhiah a ni.
Hnahthial district-ah pawh Hnahthial District Level Committee on Displaced Persons hmalakna-in Ningani atang khan Hnahthial District chhung, Thingsai khuaah Biometric Enrollment of Displaced Persons kalpui tan a ni a, a tahtawlin khaw dangah pawh kalpui chhunzawm zel tura ruahmanna siam a ni a, Bawrhsap pisa chhinchhiah danin tun dinhmunah hian Hnahthial district chhung khaw 20-ah Relief Camp 13 leh mi in luah Myanmar raltlan mihring 701 an awm mek a, Thingsaiah hian tam berin, mi 230 an awm a, raltlan zingah hian puitling 436 (mipa 198 leh hmeichhia 238) bakah naupang kum tling lo 265 an awm mek a ni.
Tun dinhmunah hian Mizoramah Myanmar raltlan hi mi 32,504 an awm mek nia chhinchhiah a ni a, Cham-phai district-ah tam berin, Lawngtlai district leh Siaha district te’n an dawt a ni. Kum 2021 February ni 1-a sipai-in Myanmar sawrkar thuneihna an pawng lâk hnu thla khat vel atang khan Myanmar atang hian raltlan awm tanin an tam lai ber phei chuan 50,000 an tling hial a ni.