Thuhma
Pathian leh sawrkar zarah Serchhip khua hi Mizoram khawpui te zingah tui hnianghnar ber pawl kan lo ni ṭhin a. Tunah erawh harsat lam kan pan ve ṭan ta niin a lang. Hei hi ‘THU DIK’ kan pawmtlan ngei ngei ngai alo ni ta a ni. Tichuan, Serchhip khua chu Tui-harsa-Khua, tui lama ṭan lak ngai kan lo ni ta tih kan hre lehzual thei ang.
Tuna kan Dinhmun
a) Mihring kan pung : Serchhip Tuilak (Greater Serchhip W/S/S) hawn kum 1997 chho vel te kha chuan Serchhip khawpuiah hian mihring 13,688 (as per National Census Record) zet chauh kan la awm a. Tui pawh kan la hnianghnar hle, kar khatah ṭum hnih lai PHE Department lam pawhin mipuite min la pe thei a ni.
Kum 2011 chhiarpuiah chuan a let deuhthawin kan lo pung ta a, mihring pawh 21,157 lai kan lo tling ta hial mai. Mipui heti zat zinga za zela 95 (95%) chu chu mihring sing hnih vel hian tuikhur hmun dang pan buai lovin he PHE Tuilak-ah hian kan innghat ta ṭhup mai niin a lang. Chumai ala ni lo, khawpuiin a ken tel, chhiarpuia tel lem lo, zin veivak, sawrkar hnathawk, sumdawng, zirlai te leh sipai adt. (floating population) pawh tihtham fe kan lo neih belh ve ta. Hengte hian khawi dang mah pan bik lovin PHE tui pump-ah tho an inhnangfak lo thei lova, PHE tui pump chhuahin a châwm hi alo berah mihring mi 25,000 chuang zet chu kan tling tawh ngeiin a rinawm.
b) Kan innghat nghet ta lutuk : PHE Tuilak (Greater Serchhip W/S/S) hi motor angin lo tehkhin ta ila,a tira quintal 130 vel zo taka phur ṭhin khan a upat/hlui tawh lamah quintal 250 vela rit phur mek ang kan ti thei ang. Chumai ala ni lo, a neitu mipuite hian a driver (PHE Deptt.) remtilo chung chungin ala kal theih tho hi ti niawm tak hian keimahni kan chuang mai duhtawk lovin kan bungraw, Bawk* lian pui pui dânin a phal loh; Insak nan te, Motor sil nan te, khawlai phuh hun nan mai bakah ran ei leh in atan te thlengin kan la hmang ta hram hram a, khaptu phei chu awm lo se, kan motor hi kan hmang kulcho hma ngawt ta ve ang. A phurh tur bika dânin alo ruahman sa – ei leh in, inbual leh insuk nan bak kan Motor (Greater Serchhip W/S/S) hi kan phurh nasat tir ta lu deuh a ni lo maw??
c) Tuipu te dinhmun : Heti zozai mipuite chawm tur hian Sawrkar chuan sum leh pai tam tak a senso alo ṭul a. Mihring tha, khawl tha, kawlphetha bakah diesel leh oil engemawzat nitin hman ral alo ngai ta a ni. Tui sem ringawt pawh mi za dawn kawlanichhuakchhiarin Sawrkar holiday leh kan hunpui Krismas leh kumthar chawlh pawh hmang ṭha mumal hman lovin an phet buai a zarah mipui ten tui kan lo neih theih phah ta ṭhin alo ni.
Thawktu EE aṭanga a hniam ber te hlawh bakah tui pump-na senso hi kumtin Serchhip khawpui bik senso pawh hi namai lo tak a ni, cheng vaibelchhe tel tak meuh meuh hemi atan hian a kal ral (luang ral?) alo ngai ta a ni.
Engpawhnise, Sawrkar chuan engzat pawh lo hmang ralin, la hman ral zel pawh la inhuam mahse,harsatna (satliah lo) ala awm ta cheu mai, ṭhenkhat chauh han tarlang ila.
Harsatna thenkhat
i) Kawlphetha : Ṭhal lai chuan Mizoram pum hi power supply lamah kan la harsa ziah, hei hi kan kumtin dan a ni. Hei vang hian a changtu Deptt. lamin tui pump nan power supply pek tam duh hle mahse a pe tam tawk thei bik lo. Tui pump nan nitin darkar 12 vel mamawh a nih laiin power supply hmuh miah loh châng a tam bakah hmuh chang pawhin darkar 6 bawr vel hi hmuh dan tlangpui a ni ṭhin a ni. Hei vang hian tui pump chhuah tam theih a ni lova, mipuite tuiah kan harsat phah ta ṭhin a ni. Kan power hman ai te hi mipuite hian tui pump nan hlan (sacrifice) phal ta ila, tui-ah chuan kan ziaawm deuh ngei chuan a rinawm.
Engpawhnise, power supply hnianghnar sela, tun dinhmunah hi chuan mipui kham khawp PHE Deppt. lam pawh hian an la pe thei ngei niin a lang.
ii) Diesel khawl : Tui pumpna diesel khawl te hi alo tar ta (since 1997). Darkar rei tak a tlantir ngam ta lo, rinrawla neih chi an ni ta lo hi harsatna lian tak a tling bawk niin a lang.
iii) Pipe line : Tui dâwt te pawh alo tar ta a, alo tuiêk ṭan ta. A pût (leakage) neuh neuh siam ṭhat tur vengtinah a awm ta deuh reng mai. Hei hian tui pump chhuah sa mipui hnen thleng lova bothlau/luangral a titam ta deuh ni pawhin a lang.
Tihtur kan nei
i) Van ruahtui khawlkhawm : Kan nu leh pa ten thil ṭha deuh mai an lo chin ṭhin, Van Ruahtui khawl khawm (Rain water harvesting) nachang an lo hriat ṭhin kha ṭhangthar te (a bikin Serchhip mipui te) hian kan hre ta lo lutuk hi a lungchhiatthlakin thil pawi tak a ni zel ang tih a hlauhawm hle.
Pathianin Mizoram hi ruahtui ṭha takin min châwm a. Riral miah lovin dahkhawl ta zel ila, kum khat chhunga ruahtui tla hian Zoram pumpui hi feet 6 (2000 mm) vel laia chhahin tuiin min khuh thei dawn a ni.Tuilet tenau akn tawng a ni ringawt ang. Hetikhawpa tam, kan ei sen loh Pathianin min pek lai hian Serchhip khuaah bik phei chuan tuidawn neia ram kan awm ta bar lo. Fur lai pawhin tui kan nghei ṭep ṭep ta hlawm a nih hi!!
Ruahtui khawl nachang hria ila, chuchuan kan in leh lo leimin mai tur lakah thui tak min venhim sak dawn bakah mahni kan inṭanpui tihna alo ni ang a, sawrkar pawh nasa takin kan ṭanpui tel nghal dawn bawk tihna alo ni ang. PHE Deptt. tuipu teho pawh biaktlawn a ṭul tawh kher lovang. Tin, tui pump darkar alo tlem phah chuan,a senso pawh alo tlahniam ngei ang a, Sawrkarin hmasawn hna dang thawh nan sum a hum theih phah dawn alo ni zel dawn alo ni.
ii) Tihtur kan nei theuh : Changkanna-in a ken tel pakhat chu tui hman tam hi a ni. Renchem takin tui chu nasa taka hman tur a ni. Mahse ṭul lova riral (loss) tam ta lutuk hi pawisa note paih bo angah hial inngai ila. Kut sil dan thlenga mahni inchhungkhur ṭheuhah inzirtir ṭan ila, tui chhe hman nawn (Recycling) te zir thiam tumin Tap (tui-herh-haw-na)khar phui lova kan inthlahdahsan mai mai ṭhin a nih pawhin sim a hun ta khawp mai. Insak nan, motor sil nan leh khawlai phuh huh mai mai nan PHE hian tui an pump chhuak lo tih te hre tharin ruahtui khawlkhawm hmangin chutiang chu tih thar tum ta zawk ila, nasa takin hma kan sawn ngei ang.
iii) Tunge thi awrhtir ang? : Hetiang kawnga mipuite kan lo harh (aware) theih nan erawh hrilh hriat, finchhuah, kaihhruai leh tihhmuh kan ngai ngei ang le. Hetiang (awareness) lam hi PHE Deppt. pawh hian tun ai hian tiri tam lehzual ta sela.media lamin ṭan han la bawk sela. Tin, tui hna humhalh kumpuan meuh a neitu YMA pawh a râlbâng duh bik kher dawn em ni? Tin, Sawrkar building reng rengah ruahtui khawlna tel ngei tura dân siam (bye-laws) te pawh hi thil ṭul tak a ni tawh lo maw?
Thubelh
i) PHE Tui Pump chhuah sa hi : Damdawi (Alum) hmanga thlitfim, mipuite hnena sem hmaa bleaching tui (Sodium hypochloride) a tâwk chauh a telh/pawlh, PHE tui pump chhuah sa hi ei leh in, insuk leh inbual nan bak thil danga hman hi dân kalh a ni tih i hre thar theuh bawk ang u.
Hetihrual hian Scientific/laboratory proof la awm chiah lo mahse, PHE tui pump sa te hi Alum leh Bleaching a tel avang hian Iron rod leh Cement tan chuan ṭhian ṭha a ni lo tawp mai. A insik chiah loh (direct contact) pawh hian hun rei lo te chhungin cement-in a chhiat hma phah em em bakah Iron rod leh thir lam chi reng reng chu a tuiek nghal zung zung mai a ni. In sak nan chuan PHE tui pump chhuah nilo, vanruahtui ngei hmang la i inchhir lo zawk ngei ang.
Tin, Serchhip khuaah ngei pawh Septic tank khat kan sawi ri ve ta fo mai. A chhan tam tak zingah a siamphung dik lo chu thukhat nise, PHE Tui pump tui kan hmang hian kan Septic Tank te ti-Septic-tu, natna hrik te reuh te te, bacteria te hi a that thei êm lo a nih pawhin an ṭhian ṭha chu a ni hauh lovang le.
Chuvangchuan, ruahtui khâwl nachang hria leh insak nan, motor sil nan leh toilet-a hman nachang hria la, mifing ilo ni mai ang.
Foot Note:
1)Bawk* tih hi tunhma khaw pakhata nu ho bazar kal tur hian Busah an thlai ilo te man chawiin an phurhtir thin a,bag khat-ah chuti zat tiin rate a awm sa vek a,bag tling lo puana bawk ang te hi chu a man an chawi tel ngai lova,nu pakhat phakar ve deuh hian puan lian pui hian a thlai zawrh tute te hi bag khat aia tam mah mah tur hi bawk tih hmingpu tho hian a bawk thin a,chu chu handyman leh conductor ten an hlan pah hian ring tawkin bawk an tihkhum vak thin a ni.Thil a nihna baka hmang uchuak sawi nan hetah pawh hman a ni.
2) Data/figure engmah lakkhawm a ni lova,he article hi General Idea tak meuh a ni e.