Mizo tena Kut kan neih zinga a hlut hlawh ber leh a ziding awmchhun Chapchar Kut hi kum tin kan hmang thin a, kuminah pawh hian March 7 ah hian kan hmang leh dawn a ni (Mizo te Kut zinga a ziding awmchhun ka tih nachhan hi Kut kan hman lar ber anih vang a ni, kut dang, Pawl Kut leh Mim Kut hi chu hun rei tak kan hmang mumal tawh lova, tunhnaiah kan thar thawh leh mai chauh a ni). Chuvang chuan kan hma lawka he Kut kan hman leh turah hian kan thuneituten a hman dan tur chipchiar taka an rel hma hian duhthu ka han sam ve teh ang.
Chapchar Kut hi Mizo tena kan kut neih hlut ber a ni a, chuvang chuan he kut kan hman danah pawh hian kan uluk hi a phu hle a ni. Tunlaia kan hmandan tam zawk hi chuan kan Mizo Society leh Culture kha a rapbet ta lek lek niin a hriat, chuvang chuan he kut hlu tak mai hi tunlai changkanna hmanga kan her rem hma ngei hian Mizo te hi harh chhuak ila, Chapchar Kut dik tak i hmang ang u.
Tunlai khawvel a changkang a, Mizo te pawh hi kan changkang chak, midang thil tih dan kan copy nasa a, a bik takin khawthlang ram ho tihdan changkang tak tak kan lachhawng nasa hle. Pathianin hmun mawi tak min pek Reiek tlang te leh Hmuifang tlang te pawh a mawina pangngai hliah trep khawpin tunlai changkannain kan thuam a, kan Tourist Lodge inthiarnaah lah European Commode kher vuah loh chu changkang lo riauva ngaihna kan nei a, ka Mizo pangpar aiin Anthurium ching nih kha changkang ta riauvin kan inhre bawk a. Hetiang ang hnam kan nih avang hian kan Chapchar Kut hman danah pawh hian kan duh changkang ta hle mai, chuvang chuan a hlut tur angin he Kut hi kan thinlungah a hlu ta lo tial tial ti ila kan sawisual awm love. Engtin nge hma kan lak tak ang?
Chapchar Kut hi Mizo te kut anih ang ngei hian kan hman leh hun chuan Mizo thei ang berin hmang ila, he Kut lo hi chu thangthar te mithmuha kan pi leh pute ziarang leh an chindan kan lantir theihna hun kum khat chhungin kan nei meuh lova, chuvang chuan he hun hi thangthar zawk te tan kan pi leh pu nundan mawi leh chindan te kan thlah kal zel tur ten an theihnghilh mai loh nan kan lantirna hun remchang atana kan hman thiam a pawimawh hle a ni. Sound System tha ber ber nen concert ang maia hman hup hup ai chuan he Kut-ah hian a kal zawng zawng te chu Mizo thuam anga inthuam vek nise (Official chenin), tin Mizo lam leh chindan thin a tam thei ang ber lemchan hmang a lantir ni bawk se. Engkim kan hun hmana hrim hrim a Mizo takin ni thei bawk se.
A pawimawh berah chuan Chapchar Kut hi enge ni a, engvangin nge kan hman thin? thin hi thangthar ten awlsam leh chiang taka an hriat theih nana document siamsak hi Chapchar Kut kan hman chhan ber ni thei se. Tunlai zaithiam lar te an zai leh zai loh avanga Kut hlawhtling leh hlawhtling lova teh ngawt te hi a dik lo. Tin Pathian thu nena kaihpawlh phet tum a, hunserh hmangtu siam talh te hi a tul lem lo. Chapchar Kut hi Kristianna awm hmaa Mizo pi leh pu tena urhsun leh hlim taka an lo hman thin Kut ani tih kha hre thar leh ila, chuvang chuan khang hunlai a an tihdan mil tur ber khan ruahmanna engkim kalpui ila a fuh ber ang. Chutianga Mizo taka he kut hi kan hmang anih ngat chuan a hmuna thlir peih kan tam lem lo pawh a ni thei, mahse ramdang khualzin (Foreign Tourist) erawh kan hip phah ang a, kan Chapchar Kut hman chu TV a chhuah tlak, hnamdang te entirtlak a ni ngei ang.