Ke Lawnga Lei Rah Hi Hrisel Nan a Tangkai (Health Benefits of Earthing or Grounding)

Women’s Ministry of Mizo SDA Church
4515 Sandy Spring Road
Burtonsville, MD 20866

Tun tuma kan article hi chu a mak dangdai ve hle in ka hria. Kum tam tak chu damdawinah hna te thawkin leh damlo tam tak lo enkawl tawh mah ila, a chunga kan subject han tarlan hi ka tawn hriat lohna lam pang tak a ni. Thil mak tak pakhat chu kum nga dawn lai kal ta khan Laipuitlanga kan thenawm pa, Pu Zairemthanga Sailo hi a lo len chang hian ke lawng hlir hian a lo kal thin a. “Engtizia nge pheikhawk i bun loh? tiin ka zawt a. A ni chuan, “Hetianga ka tih chinah hian ka zunthlum vei a dam vek a, zunthlum tan damdawi thaber a ni. A tlangpuiin ka hriselna reng reng hian a that phah em em a ni,” a ti a. Khang hun lai kha chuan ke lawnga (barefoot) kal leh zunthlum a inkaihhnawih theih dan chu ka hre lo reng rengin ka awihlo em em bawk a ni. Mahse, hun engemawti lai kal ta atang khan, ‘taksa leh lei (earth) a han inkhawih, (contact) hian hrisel nan a tangkaizia tih hi hriselna lam hawia eizawng mi (health professionals) leh daktawr thiam tak tak, thenkhat article ziak hi internet-ah te ka chhiar thin a. Mi thenkhat chuan an enchhinna result te pawh an tarlang a ni. TV lam CNN-ah te pawh tarlan a ni tawh a. Kan zir chian deuh hnuah he article hi ka han buatsaih ta a ni. Thenkhatte chuan he subject hi in hriat ve tawh ngei ka ring bawk.

Lei (earth) leh mihring taksa a han inkhawih (contact) avanga hriselna atan a tangkai dan mi thiamte sawi, han sawi chhawn leh hi ka thiam lo hle chuan ka ring a, min lo ngai thiam dawn nia. An sawi dan tlangpui chu hetiang hi a ni:-

Lei (earth) hian hriselna atana tangkai tak ‘healthful electons’ antih hi a nei a. Heng hi negatively charged electrons an ni a. Tin, kan taksa pum hi kan khawl hman computer te, cell phone, TV’s microwaves, radios leh wireless equipment hman leh kan nun dan reng reng avang hian kan pum hian positive lam kan ni. Hetia taksa leh lei (earth) a han inkhawih (contact) hian negative electrons tam tak chu taksa chhungah khan a lut ta a. Positive leh negative electron te khan taksa chhungah, inbuktawkna ‘equilibrium’ emaw ‘natural balancing effects’ an siam a. Mi thiamte sawi danin hei hi taksa hrisel nan leh natna vengtu (immune system) tichak tur leh nachhawk nan te leh thil pun thei (inflammation) tan tepawh a tangkai an ti a ni. Kan taksa leh ‘kan awmna lei’ a inkhawih avanga hriselna atana a tangkaina hrang hrang mi thiamte sawi dan han tarlang ila:

@    Ke lawnga lei kan han rah hian free electrons an tih te chu kan lei rah atangin kan taksaah a lut thuai a. Khang free negative  electrons te khan kan taksa englai pawha thil thleng reng Oxidation vanga awm, kan taksa tana hlauawm tak, free radicals te hi positive anih avangin lei kan han rah a kan taksaa negative electron lo lutte khan positive free radicals te hi an rawn sai ta siah siah mai thin a ni. Hetiang kawng hian ke lawnga kal hian antioxidant chak tak a siam thei a ni. (Antioxidant tangkaizia chu kan han sawi fo tawh thin a) Free radicals hi natna hrang hrang cancer thlenga kaichhuaktu bulpui ber a ni.

@    Ke lawnga lei kan han rah avanga thil awm thei, an sawi leh chu thisen a ti pan (thin) thei a, thisen leh a chakna, abikin red blood cells, taksa bung hrang hranga boruak tha (oxygen) phur darhtu a ti chak a ni. ‘Journal of Alternative and Complimentary Medicine’ a an tarlan chuan red blood cells a tih chak thu an sawi bawk. Kan thil thlum leh thau eite, kan mei zuk leh kan taksaa tur (toxins) lut reng reng hian kan thisen a ti hnang (hypercoagulable) thei a. Thisen hnang chu a kal tha thei lo va, hei vang hian zeng (stroke) leh lungphu chawl neih te a awl bik a ni. Hetianga thisen kal vel a chak chuan, taksa bung hrang hrang mamawh chaw tha (nutrient) leh oxygen te a phur darh chak theih avangin natna hrikin hmun khuarna hun a neih dawn loh avangin a hrisel a ni. An sawi pawimawh tak pakhat leh chu ke lawnga kal hian thisen a tih pan chak em avangin, thisen tih pan nana coumadin emaw aspirin emaw ei te chuan an daktawrte rawn a an eilai dose kha tihhniam ngei a pawimawh thu an sawi bawk a ni.

@    Enchhinna hrang hrang, sazu-ah te, an neihah chuan zunthlum vei te thisena thlum (blood sugar) a tihniam thei tih an hmu. Enchhinna pakhat, ‘Earthing the human body influences physiologic processes’ an tihah chuan zunthlum vei te (blood sugar) thisena thlum kha a tihniam thei tih an hmu. Tin, ‘Journal of Environmental and Public Health’ chuan kan thluaka electric kal vel a ti chaka hei hian kan thisena thlum a control tha thei tih an tarlang.

Mi thenkhate’n ke lawnga kal an lo thatpui dan han tarlang ila:

Heng ka han sawi turte hi internet-a an ziah ka chhiar te an ni.

Nu pakhat chuan, (a hming ka lo chhinchhiah lo va) kum li vel chu kawng na, (lower back pain) hi a nei tawh a. “Ka hnathawhna office bula Park awmah chuan nitin chhun chawfak pahin ke lawngin ka kal thin a. Chawlh kar khat hnuah chuan ka kawng na chu a lo dam ta vek mai a ni,” a ti.

Mi pakhat chuan, “Lu na benvawn ka nei a. Ka thluaka thisen dawt thenkhat hi hnawh phuitu an awm ni hian ka hria a. Pheikhawk bun lo va huanah te kan kal chinah chuan ka lu na a dam hmiah mai,” a ti a.

Mi pakhat, Kent Waden in ti chuan, “Kum 15 chhung chu hnathawhnaah chuah pheikhawk bunin ka lo awm tawh a. Ka hnung leh khupna thin chu a bo hlen hmiah tawh a ni,” a ti bawk.

Mi pakhat chu natna khirh tak Lupus an tih hi kum 6 lai a nei tawh a. Zinga a han thawh te hian a kut pawh hi a tipharh tha thei tawh lo va. Mahse he thil hi internet lam atanga a lo hriat hnu-a an tih tan ve chin rei vak lovah chuan bowling game te khelin a kal thei ta mai a ni.

Sam 104:24 chuan, “Lalpa I thil siam hi a va tamin I va siam thiam tak em! Lei hi hausaknain I tikhat si a.” a ti. Kan taksa hriselna tura kan mamawh hi Pathian engkim siamtu thil siam atanga mawlte a hmuh theih a ni hi a va ropui em! Pathian chuan a thil siamte hi hrisel taka awm turin min duh a. Bible chuan, “Ama chenna Temple kan ni,” a ti a. Hrisel tak leh thianghlim taka kan vawn theihna turin theihtawp I chhuah ang u. Pawisa dere pawh sen ngailova, mitin tihtheih si, Pathian thilsiam atanga damna leh hrisel nana thil tangkai tak lo awm thei hi a va ropui tak em! Lalpa chu fakin awm rawh se.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram