Zothlifim Logo
Loading ...

Tukin ka zing tho chu ka han hawi vel a,In bul leh kawng dung leh daivelah thing leh pangpar chi hrang hrang kawngpui dungah an lo vul leh ta chhing chheng mai!!,ka rilru chuan, ‘Ee khai! Green Mizoram Day Programme chu kan Ser khawpuiah a hlawhtling ve ta a nih hi,’ a ti a.Ka ngaihtuahna kal zel chuan kan Mizo thawnthua; Lasiri leh Lasari, Thangsira leh Thangzaia thawnthu ka pi’n min hrilh melh melhlai te kha a lo lang uai uai a, chumai ala ni lo, Tualvungi’n a hmangaih ber Zawlpala thlan a zawnna kawng te chu min chhuitir bawk a, naupanghoin Tualvungi zawhna, hla thu hmanga an lo chhang thap thap lai te kha bengah a ri leh ta emawni tih mai tura chiangin,
“Zawlpala thlan In tualah,Satin lu a tlar bung e,
Tuangtuah par a vul chhung e,sawtah….”
Chumai ala ni ta lo,Fam Lalzova’n Luahloh Lungdi hla-a’n,
“Ka rawn fang leh hmana kan tuanna tlang
Tuahpui leh vau an vul leh ta…”

Mi nu leh mi pa niin hraiduhleng chawiin tlang hranah nun kawng chhuk chho an chhiar tawh hlawm si a le!!!…..

Ni…Chhun leh zan,tha leh sual,a dum leh a var te hi inkawp tlat,mahse inmil hauh si lo an nih laiin Fartuah leh Vau, thallaia an han vul dun chuk mai thung hi chu a aia inhmeh hi he khawvelah hian a awm chuang bik dawn em ni tih mai tur  a ni!! Thu leh hla lama kan entawn Sapho khuan fartuah par leh vau parte hi lo nei ta ngat se,an chawi nasa ngawt ta ve ang,chu chu college leh University lamah kan zir leh tluk tluk emaw a ni ngei ang a. Mahse,an lo nei lo hlauh hi kan vanneihna tak pawh a ni kan ti thei awm e.

Pathianin ram zimte min pe a,a chhungah thil hlu tak tak, nungcha leh ramngaw (Flora & Fauna) te min dahsak a.Heng te hi an mawizia leh hlutzia ngaihtuah thin ila. Sap,Juda,Vai leh Korean thil te mawi zawk leh tha zawka kan hriat tlat chhung chu hnam zahawm kan ni ngai dawn lo alo ni reng mai.

Hramthiam va tinreng chiar nuai nuai karah lui te luang ri ker ker leh thlifim thaw heuh heuh ten eng thuchah nge an hrilh che tih lo hriat chhuah tum la. I hre chhuak ta hlauh a nih chuan i hal mai mai lovang a ,i hraiin i perh emaw i kap emaw duh tawh kher bik lovang.

Chutih hunah chuan, nun hlutzia i hre thar ang a, Siamtu Pathian i fak ngei ang.He rama ilo piang ve hi i vanneih bikzia hre tharin ram dang i awt bik hauh lovang le.

Tui taka muhil kan han harh hlawl ang mai a,ka ngaihtuahna kal ding tak atanga ka han harh meuh chuan ka han hawi vel a, kan SER khawpui leh a chhehvel chu hmuh peih a thu thing leh mau te chu a tam vei nen, a vul chi leh a par lam chi erawh hmuh tur a awm bar lo alo ni reng mai.!!

Green Mizoram Day Programme an rawn duang chhuak hi chu a fuhin a inhmehin ngawt mai. Hetihlai hian, kan thing phun tawhsate kan ngaihtuah zui lutuk loh danah te, thing tiak pakhat hung nan thing leh mau  kan neihsa engemawzat tihchereu a tul leh tho thin si te, kan thing phun tam zawkte hi puitling tur chuan kum 10 dawn te, a aia tamte pawh alo ngaih thin si avang hian kan Mizo rilru hmanhmawh nen chuan a la inhne rem lutuk lo deuh niin a lang. Tin, kan ram ang, ruahtui tam tak (tropical monsoon) zarzo, kan thing leh maute pawh enkawl ngai vak lova an mahni thua an duah hluah hluah theih thona hmuna kan hma lak dan hi zir chian deuh a,tun aia tha zawk leh Mipui nawlpui pawh kan phurtlan theihna tura ruahmanna kan siam thar pawh a tul ta hle zawk niin a lang.

Green Mizoram Day Programme hi la kalpui tho si hian Mizo mipuite rilrem zawngin her rem ta hret ila. Thing phun hi a kawngpui dung a tulna lai apianga hmala chhunzawm zel chungin, pangpar chi hrang hrang chi te thehin a chin chi, a tuh chi te pawh tuh zel ila, vawikhat a chi kan theh/tuh tawh chuan rem mai bik lovin kum tin kawngdungah a vul chek chuk mai dawn a, khaw hawi a tinuamin min tihahdam sawng sawng bawk ang a, zin veivah pawh a nawm phah sawt ngeiin a rinawm. Kan hnathawh rah kan hmu hma ang a,chu chuan min ti phur ang a, sawkar hnathawk chauh ni lo, mipui nawlpui pawh hian tunai hian Green Mizoram Programme hi kan hlut zawk ngeiin a rinawm.

Green Mizoram denchhen hian,hawh u, kan Serchhip khawpui leh a chhehvel hi hi i ti vul chuk ang u.

‘Par mawi vulna hmuntinah te LALPA a awm zel si’