Zothlifim Logo
Loading ...

— Laldinpuia —
Secretary, Serchhip District Consumer Association

Eirawngbawlna Gas hi mitin mamawh a ni a, tunlaiah phei chuan thingtuah hmanga eirawngbawl hi khawpuiah phei chuan kan tam tawhlo hle a, Gas hi kan rinrawl ber a nih tak avang hian eirawngbawlna Gas hian mitin a nghawng a, a pawimawh hle a ni.

Sub Hqrs YMA, Serchhip chuan tunhnaiah thuchhuah siamin Serchhip Sub Hqrs YMA huamchhunga eirawngbawlna Gas sem te buk vek anih theih nan Branch YMA tin te hmala turin a ngen a, YMA in hetianga mipui ten buk tling ngei Gas kan neih theih nana hma a la hi a lawmawm hle mai. Chutih lai chuan Gas buk hi YMA te mawhphurhna a ni lo, kan ti a nih pawhin a dik tho mai. Mahni eizawnna thulh a, kan area a Gas an sem dawn apianga lo buk kha kan mawhphurhna a ni chiah lo reng a ni. Amaherawhchu tunlaiin Gas buk tlinglo mipui ten kan la nasa em em mai a, hei vang hian mipui sum thil diklo titute kuta luanglut hnem thin lutuk hi a tha lo a ni tiin YMA chuan mipui te thlavang hauh nan leh mipui ten Gas buk dik kan lak theih nan hetiang hian hma a la ta a, tlawmngai turin Branch YMA tin te a ngen a ni.

Gas sem hi tu buk tur nge?
Gas buk tling lak kan duh kan ti a, a pawimawh bera chu tunge buk ta ang? tih hi a ni. LPG Marketing Guidelines 2018-a tihchhuahah chuan Gas Cylinder te hi Gas semtu ten a buk tling ngei mipuiah an pe tur a ni a, an Gas sem te a leak leh leak loh te Gas latu hmuh laiin a semtuten an check tur a ni tih a awm a, hei hi kan tanchhan tur a nih hmel. Gas semtute hian kan Gas lak tur hi a buk a tling ngei a ni tih hi an tilang tur a ni(kan hmuh laiin an buk tur anih ber chu). A nihna takah chuan Gas a buk tling loa Agency ten mipui min leitir hian dan bawhchhiatna anih avangin a semtu te hian an chawi teuh tur a ni a, hei vang hian a semtute hian a buk dikloa mipuia semchhuah hi an hlau hle zawk tur a ni.

A buk tling engtinnge kan hriat ang?
Kan Gas lak te a buk tling ngei a ni tih kan hriat theihna tur chuan a buk tling chu engzatnge tih hi kan hriat hmasak a tul awm e. Eirawngbawlna Gas mipui nawlpui ina kan lak thin hi KG 14.2 a ni a. Bur khatah hian Gas Kg 14.2 a awm tur tihna anih chu. A bur ruak rih zawng erawh a inang lo hret hret thung a, Kg 15.5/15.6 etc te a ni nawk hlawm. Kan Gas bur pangah hian a bur ruak rih zawng a awm vek a, a bur ruak rih zawng atanga Gas rih zawng Kg 14.2 belhin chumi chu kan Gas bur lak rihzawng tur chu a ni. Engemaw avanga a rih tur ang a phak loh hret chang a awm mai thei, sawrkar dan ang diak diaka kal dawn chuan diklo a tam thei fu ang. Amaherawh chu kan Gas bur lak hi a tlangpuiin a rihzawng hi Kg 29 a tling ngei ngei tur a ni. Kg 29 a tlinloh chuan a semtute hnenah a buk tling bur dang dil mai tur a ni.

Engvanginnge YMA a inrawlh a tul?
Gas buk tlin leh tlinloh hi mipuite hian kan chik ngai lova, chuvang chuan Gas phurtu driver te hian kawng lakah an hralhruin an siam danglam nasa thin hle a, hei vang hian Gas kan lak te a hman hun tur chin hmang lovin kar 2/1 ah te a zo zung zung thin a, mipui pawisa tam tak thil diklo tite hnenah a kal thin a, a pawi hle. Hei vang hian YMA lam chuan theihtawpa hma lain mipui ten Gas buk tling ngei kan lak theih nan ruahmanna a siam ta a ni. YMA hmalakna hi mipui ten thlawp ila, i thawhpui theuh ang u.

Gas sem apianga lo bukpui reng kha a ngai kher lovang, vawi 2/1 YMA ten kan lo enpui thei anih chuan mipui lam pawh kan zirtir fing ang a, a lehpek zelah chuan a hahdam tawh viau thei a ni. Chuvang chuan Branch YMA te Sun Hqqs lamin Gasbuk tura min tih hi phurrit ah la lovin a semtute hnenah hian a buk tling ngei mipui hnena pe turin ngen ila, a semtu ten mipui hnena an pekchhuah dawnah bukin a leak leh leak loh te pawh uluk takin check vek thin se, hei hi enpui thin thung ta ila. Hemi hian Gas sem chhung pawh a duh rei deuh mai thei. Amaherawhchu kan tana tha tur a ni tih hriain mipui lam te pawhin dawhthei takin nghak ila, Gas buk tling ngei kan lak theih nan theihtawp i chhuah ang u.