Hyderabad-a hmun 2-a bomb puakah mi 14 chuang thi

Hyderabad-a hmun 2-a bomb puakah mi 14 an thi a, midang 119 an hliam a, Hliam zinga 6-te hi an dinhmun a tha lo hle nia sawi a ni.

hyderabad blastNizan dar 7 vel bawk khan Andhra Pradesh khawpui Hyderabad-a hmun hnih-ah bomb a puak a. Bomb puahna hmun hi Dilshuk Nagar area a ni a, mipui tam vanglai takin bomb hi a puak a. Bomb puakte hi thirsakawra tawnbeh tihpuah nia hriat a ni. Police-te chuan he bomb puak chungchang hi an chhui chiang mek a ni.

Hemi chungchangah hian nizan khan Union Home Secretary, RK Singh-a chuan New Delhi-a thutharlakhawmtute kawmin; Andhra Pradesh Governor, Chief Secretary leh DGP-te a biak tawh thu a sawi a. Ram chhunga thil thleng chhuitu pawl, National Investigation Team-te pawhin bomb puahna hmun hi an thlen tawh thu a sawi a. Bomb puahna hmun hi mipui nawlpui paltlang theih lohvin an hunghnan tawh niin RK Singh-a chuan a sawi.

Bomb pakhat hi Dilshuk Nagar area-a Cinema hall bulah a puak a. Bomb dang leh chu Dilshuk Nagar area tho, bus stand bulah a puak bawk a ni.

He vanduaina avang hian Andhra Pradesh khawpui pahnih Hyderabad leh Secunderabad-ahte chuan hmun hrang hrangah inralrinna tur thu chhuah a ni a. He khawpuia hmun pawimawh hrang hrangah sipai dang dah belh a ni bawk a ni.

Hyderabad-a bomb puak avang hian ram chhung hmun tam takah inralrinna thu chhuah a ni a. Venhimna ngawrh taka kalpui nghal a ni a. Delhi khawpuiah pawh venhimna ngawrh taka kalpui nghal a nih thu Delhi Police-te chuan an sawi a. West Bengal leh Karnataka pumpuiah inralrinna thu chhuah nghal a ni bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram