Zothlifim Logo
Loading ...
Mizoram NewsMizoram News

Serchhip March 19, 2013: Chakma Autonomous District Council inthlan vawi 9-na chu thla thar April ni 17 neih anih tur thu State Election Commissioner C.Ropianga chuan nimin khan a puang a, he inthlanah hian Mizorama la hman ngai loh Voter Slip with Photograph (VSP) hman a ni dawn.

CADC a MDC bial 20 a Inthlan neih hun tur leh inthlan dan chungchangah hian nimin chhun khan State Election Commissioner hian chanchinbum mite leh party aiawhte a office chamber-ah kawmin a puang a. CADC inthlan tur hriattirna hi March ni 20, 2013 ah Notification tihchhuah a ni angam, April ni 1, 2013 tlai dar 5 thleng hming pek theih hun hawn a ni ang.

Hming pek luh te chu a tuk April ni 2, 2013 zing dar 11 atanga dar 3 chhungin endik a ni ang a, inhnukdawk duh te tan ni 3 tlai dar 3 thleng hun hawn a ni ang.

Vote thlak ni April ni 17 ah zing dar 7 atanga tlai dar 5 thleng vote thlak hun hawn a ni ang a, Vote tla te chu April ni 19 zing dar 8 atanga chhiar tan a ni anga, Chakma Autonomous District Council inthlan kaihhnawih zawng zawngte chu April ni 26 ral hma a zawh fel vek tur a ni.

CADC General Inthlanpui vawi 9-naah hian Electronic Voting Machine hman a ni dawn a, Mizoram inthlana a vawikhatna ni turin VSP he inthlanah hian hman a ni ang. VSP-ah hian Voter te thlalak, hming, EPIC No., Voter Serial No., Polling Station hming leh number, inthlan ni leh hun te bakah tul dang te a chuang a. voter ten EPIC an tibo a nih pawhin he VSP hmang chauh pawh hian vote a thlak theih dawn a. EPIC leh VSP tibo te tan pawh Polling Booth tinah VSP Facilitation Desk siam a ni ang a, hemi hmunah hian Station Officer hnen atangin duplicate VSP a lak theih ang. Returning Officer leh Asst. Returning Officer ten Polling Station tina Station Officer-te kaltlangin inthlan hma ni khat la awmah in tinah kalin VSP hi an semchhuak vek dawn a ni.

Inthlan puan a nih tak avang hian inthlan Lawngtlai Dist-ah Model Code of Conduct hman tan nghal a ni a, CADC inthlan atan Observer pahnih ruat fel a ni tawh bawk.

He inthlanna neih turah hian border fencing pawna awm Polling station 5 amite chu ramri hung chhung lam ngeia vote thlak turin ruahmanna siam a ni a, in remchang a awm lo anih pawhin shed siam chawp mai ani dawn tih SEC chuan a sawi a, border fencing pawnah hian voters 1659 an awm a ni.