Serchhip – Buarpui kawng siam tur chungchang sawiho

Nimin khan Serchhip Bawrhsap Pi Juhi Mukherjee IAS hovin DC Meeting Room-ah Asian Development Bank hnuaia siam tur Serchhip – Buarpui inkar kawng (55 kms.) chungchang sawiho a ni a, hetah hian kawngpuiin a tantlang tur khaw hrang hrang Village Council aiawhte, Serchhip ASO, ram teh fel tu Revenue Department Surveyor te bakah Project Director, PIU Mizoram PWD Office atangin Pu Lalzawmliana, EE a tel bawk a ni.

Bawrhsap Pi Mukherjee chuan Serchhip-Buarpui kawng siam tur ah hian compensation Draft Award fimkhur taka siam anih thu a sawi a, khaw hrang hrang VC te leh kawng siam turin a kaihhnawih Department hrang hrang official te thawhrimna ah lawmthu a sawi a, a kaihhruaina hnuaiah Draft Award siam mek chu thlir ho niin VC ten an hriatthiam loh lai leh zawh fiah an duh te zawtin inhrilhfiahna hun hman a ni.

Er. Lalzawmliana, EE pawhin Serchhip – Buarpui Road hi Asian Development Bank hnuaia thawh anih dawn avangin uluk thei ang bera kalpui anih thu leh, Forest clearance leh Revenue clearance tihfel anih hnu ah chauh hna thawh tan theih anih tur thu sawiin, harsatna awm lo a tluang taka kalpui anih chuan kumin October thla vela hna thawh tan theih a beisei thu a sawi.

Tarlan tawh angin Serchhip to Buarpui ADB Road hi kilometer 55 a thui a ni dawn a, he kawngpui thar siam tur hian Serchhip, Thenzawl, Sailam, New Khawlek leh Buarpui ram te a tan tlang dawn a ni. Draft Award ah hian compensation dawng tur Chhungkaw 256 an tel a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram