“Tui Renchem Turin Mipuite Ka Ngen Tak Meuh a ni”- District Bawrhsap
Serchhip March 14, 2013: Nimin khan Serchhip Bawrhsap Pi Juhi Mukherjee IAS hovin Serchhip khawtlang hruaitute leh Sawrkar hotu-ten DC Office Chamber-ah tunlaia Serchhip khawpuiin tui harsatna a tawh chungchang an sawiho.
Nimin \hutkhawmah hian Er. Lalhruaia, EE, Serchhip WATSAN Division, PHED chuan Serchhip khawpui hman tur tui pump-na atana an hman ber IOC Venga Booster Pump-a Diesel Engine la \hat loh vang leh Electrict Current hmanga tui pump turin Power Supply an mamawh zât an hmuh theih loh vangin tui pump chhuah theih zât a tlêm em em a, hei hi harsatna an tawh chhan ber a nih thu a sawi a, khawl chhia siam \ha tura theitawp an chhuah reng thu sawiin, Power Supply chungchangah P&E Department-in theihtawp chhuaha an ngaihpawimawh sak thu a sawi bawk.
Er. JH Malsawma, EE, P&E Department pawhin PHE-in tui an pump theih nan theihtawp an chhuahpui thu leh an ngaihpawimawh ber te zinga an dah thu a sawi a, tunlaia Mizoram puma power supply dinhmun \ha lovin Serchhip pawh a nghawng ve avangin an duh angin hma an lakpui thei bik lo a ni tih sawiin, mipuite’n an harsatna hriatthiampui se a duh thu a sawi bawk.
Zawhna chhangin Er. Lalhruaia chuan tuna IOC Booster Pump hi Kirloskar Company siam niin, kum 1997 a\anga hman \an tawh a ni a, khawl hi a hlui tawh avangin leh a siamtu Company-in hetiang hi an siam chhuah tawh loh avangin a part lei tur a vâng hle a ni a ti a, Kolkata leh Pune thlengin an zawn kual thu leh tunah hian an zawn hmuh theih thuai a beisei thu sawiin, karleh tâwp lamah tal khawl siam \ha hman tura a part mamawh hi zawn hmuh ngei a tum thu a sawi bawk.
He hunah hian khawtlang hruaituten Booster Pump thar leh \ha zawk neih a nih theih-na tura hma lak \ula an hriat thu an sawi chu chhângin District Bawrhsap chuan theih-tawp chhuaha hma lak a tum thu a sawi a, Bawrhsap chuan mipuite chu tui harsatna an tawh mek chhan hrethiam tur leh tun dinhmunah chuan tui an hmuh ang ang renchem taka hmang turin a ngen tak meuh a ni tih a sawi a, PHED lam pawhin tui sem chungchangah rualkhai taka sem a nih theih nan uluk leh taima lehzuala an tuisem te vil turin thawktute inchah nawn leh an tum thu an sawi bawk.
Nimin \hutkhawmnaah hian EE,(PHED), EE,(P&E), Additional DC, SDO(Sadar), Serchhip khawchhung VC awiawhte, Sub-Headquarters YMA aiawh te leh Consumer Union aiawh te an tel a ni.