Allianz Arena-ah Barcelona an tlâwm chiang

Champions League semi final 1st leg, Allianz Arena-a khelah Bayern Munich chuan 4-0-in an mikhual Barcelona an lo sawp a, karleh Nilaini khian Camp Nou-ah 2nd Leg khelh a ni leh dawn a, hetah hian Barcelona chuan Final thleng tur chuan 5-0 tala an chak a ngai dawn a, Bayern Munich tan chance a ṭha ta hle a ni.

Inkhelh hmain Bayern Munich coach Jupp Heynckes chuan Barcelona playmaker, Lionnel Messi lo kirleh tur chuangchang leh Messi chu an harsatna a nih dawn loh thu a lo sawi lawk a, a sawi ang ngei chuan Messi inhliam damkawr chuan Barcelona tan thil ropui a ti thei ta lo.1997-a Dynamo Kiev laka an chakloh hnua Barcelona-in Europ-a an chak loh nasat ber ṭum an tawng a, tun hmain Champions League semi final first leg-ah si 4 faia chaklo an la awm ngai lova, hei hi a vawi khatna a ni.

Barcelona khelh dan a ngai leh a, ball an chang tam a, midfield-ah ball an inpekual nasa, Barca in midfield ah ball hmu tam mahse nidang ang lo takin an hmatawngte an hriam lo a, ball chang tlêm zawk Bayern hi an nawr chhunah a hlauhawm zawk an ni. Minute 25 ah Bayern  corner kal zel aṭanga Robben cross, Dante lo khawihper chu Thomas Muller chuan hnai te aṭangin a tauh lut a, Allianz Arena-a Bayern fan 60000 chuang authawm a ring kher mai.

Bayern goal thun hnu lawkah Messi chuan thun theihna remchang a nei a, mahse Dante bawkin a laksak hman hlauh. Hei bak First Half-ah goal a lut lo.

Second half an ṭan chauh a, Robben cross chu Muller chuan changin goal-ah a tauh phei a, hei hi awlsam tein Mario Gomez chuan a lo thun. Hemi hnu hian Muller, Ribery leh Robben ten chance tha tak tak an nei zui nghal mawlh mawlh a, second half tirlam chu mual neitu ‘ta’ a ni.

Barcelona midfielder te ke-ah ball dam viau ṭhin mahse tlarhmaa Pedro, Messi leh Sanchez te bul a thlenin Bayern player ten an hnaihchilh hman deuh zel a, Iniesta meuh pawhin ball a keng rei hman meuh lo.

Minute 73 a ni a, Schweinsteiger through ball chu Robben chuan umlutin goal mawi tak a thun a, 3-0 a ni der mai. He goal luh hma hian Robben dangtu tur Alba chu ball awm loh laia Muller-a’n a dan tlat avangin Muller hi a ‘foul’ a, mahse referee in a ham tlat si lo.

Minute 82 a ni a, veilam aṭanga David Alaba cross chu khelṭha em em Muller bawkin goal-ah lo chantirin, hun a tawp meuh chuan Bayern hi 4-0 ngawtin an chak ta a ni.

Barcelona Coach hlui, Pep Guardiola-a’n season thara a thlak tur Bayern coach, Heynckes chuan, “Result lawmawm tak a ni a, mahse Spain ah minute 90 kan la inkhel dawn a, hmabak harsa tak kan la nei a. Zanina kan chak hi kan lawm ang a, mahse a bak chu second-leg tana inpuahchahna hlir a ni ang,” a ti a, Barcelona defender Gerard Pique chuan “Chhuanlam tur vak kan nei lo. Keini aiin an rang zawk a, an chak zawk a, an khel tha zawk bawk.” tiin a sawi a, a sawi dik khawp mai. Round of 16-a 4-0-a Milan hneh theitu Barcelona hian 4-0 talin Bayern Munich hi lo hneh let ve thei tak maw?