Annual Plan Nilaini-ah chinfel rin a ni

Kumin sawrkar kum atana Mizoram Annual Plan sum hmuh tur chu May ni 1,
Nilaini khian Planning Commission-in a chinfel rin a ni. Plan
discussion a tel tur leh sawrkar thil pawimawh dang ti turin Chief
Minister, Pu Lal Thanhawla chuan Inrinni chawhnu khan New Delhi a pan
ta a. New Delhi-a a cham chhung hian Mizoram sawrkar mamawh hrang
hrangah Central sawrkar hruaitute a hmu ang a, Nilani, May ni 1-ah
Planning Commission Deputy Chairman, Pu Montek Singh Ahluwalia nen kum
2013-2014 atana Mizoram Annual Plan hmuh zat tur an sawi dun dawn a
ni.

Chief Minister hi Home Minister Pu R.Lalzirliana, Chief Secretary, Pi
L. Tochhong, Secretary to Chief Minister, Pu LR Thanga leh Planning
Board hotute leh Planning Department-a Officer-ten an ṭawiawm dawn a
ni.

Kumin sawrkar kum atana Mizoram sawrkar budget pass takah khan Mizoram
Plan sum chu nikuma Plan sum hmuh zat cheng vbc 2300 anga dah a ni a,
tuna Mizoram Annual Plan sum chinfel turah hian a punna a awm chuan
chu chu budget-ah hian Supplementary Grant-anga thun leh mai a ni ang.