Chakma Autonomous District Council (CADC) inthlanna neih zawh taka MDC tling tharte chu Inrinni khan rinawmna thu tiam tira lakluh an ni.
CADC Session Hall-a inkhawmah MDC thlan tlin tharte District Council Court President, Pu LB Chakma-chuan rinawmna thu tiam tirin a la lut a. Inrinni-a MDC atana rinawmna thu tiam tira lakluh zawng zawng hi mi 19 an ni a, An zingah hian Udalthana bial aṭanga thlan tlin, Congress member, Pu Ajoy Kumar chu a zin chhuah vangin a tel ve lo va, hun remchang hmasa berah rinawmna thu tiamtira lakluh a la ni dawn a ni.
Hetih lai hian Chief Executive Member tura thlan, Pu Buddha Dhan Chakma lakluh hun tur leh Chairman leh Deputy Chairman thlanna tura Session hmasa ber neih hun tur erawh chu tun thlengin ruahman fel a la ni lova, Pu Budha Dhan Chakma chuan sorkar a siam theih thu Governor-ah ziakin a thlen anga, chu chu Governor in a pawma, CEM atana a ruat hunah rinawmna thu tiamtira lak luh a ni chauh dawn a ni.