Nimin zing khan Central YMA hnuaia Ruihhlo do pawl Central Anti Drug Squad (CADS) chuan tunlaia damdawi lar tak Pseudoephedrine cheng nuai 50 chuang zet man an man.
CADS-ten ruihhlo do beihpui an thlak chhoh mekah nimin zing dar 3:30 vel khan Selesih-ah Lalṭanpui S/o LT Sanga (L) hnen atangin parvon spas mum 127 an man a, Malsawmtluanga s/o Zaneihmawii hnen aṭangin parvon mum 600 an man bawk a, Excise te kut ah an hlan nghal a ni.
CADS duty te hian nimin zing dar 5 bawr vel khan Selesih leh Zuangtui inkarah Bolero MZ 04-2480in a phurh Pseudoephedrine mum 7,20,820 chu an man bawk a, heng damdawi te hi tunlai market rate chhutin `50,45,740/- man hu vel niin an sawi.
—————————————-
Voter Slip hmang dawn
Chakma Autonomous District Council (CADC) inthlanpui neih turah Mizoram State Election Commission (SEC) chuan Mizoram-a election neih tawha la hman ngai loh Voter Slip a hmang dawn a ni. Voter Slip-ah hian voter hming te, constituency hming te, part number leh hming te, EPIC number te, serial number te, polling station number leh hmun hming te, vote thlak ni turte bakah voter thlalak a chuang vek dawn a. Hei hi inthlan hma ni-ah election official-ten chhungkaw tinah tlawhin, voter hnenah an pe vek dawn a ni. Hetianga Voter Slip hman a nih chuan, polling station hmuna mahni hming leh serial number zawn buai a ngai tawh dawn lova; hetiang buaipuitu tur political party/NGO an awm a ngai tawh dawn lo bawk a ni.
SEC chuan CADC inthlanpui chu felfai taka neih a nih theihna turin theihtawp a chhuah zel a. Inbiakpawhna te, inkalpawhna te, venhimna te tihchangtlun chhoh zel a ni. CADC inthlanpui atana Model Code of Conduct chu Lawngtlai District puma hman tur a ni a; CADC area pawn lamah erawh chuan sawrkar hna kal laite chu thawh chhunzawm theih a ni. Inthlanna atana inbuatsaihna enfiahin State Election Commission Secretary Pu H. Darzika leh Deputy Secretary H. Lianzela te chuan 26th-27th March, 2013 chhung khan Chawngte an tlawh a; 11th April 2013 khian SEC official-te hian a hmawr bawknan Chawngte hi an tlawh leh ang.