Lunglei District Court Lunglei chuan nimin khan Court Complex-ah Police leh Excise ten thil an man, Ruihhlo chi hrang hrang leh pawisa lem, a vaiin `18,38,390/- hu an halral a, an thil halral hi nikum November thla aṭanga nimin thlenga an man khawm a ni.
Addl. District & Sessions Judge Pu Vanlalenmawia chuan halral zingah hian sâp zu engemawzat a tel tih sawiin hei hi a zuar chhawngtu ten an pawlhdal niin a sawi a, Pawisa lem an halral tak chu a neitu ni a puhin thiam a chang a, hei hi he thubuai ngaihtuahtu Case IO in a tihtur a tih ṭhat loh vang a ni a ti.
Pu Vanlalenmawia chuan NGO ten sual an do na kawngah Police leh Excise te chet hmaa an lo chet palh thin avangin Dan hmaah thiam changlo tur zawkin thiam an chan phah fo thin tih a sawi bawk a, Police leh Excise ten dan ang thlap a an man chuan an hrem ngei ngei zel a, tunah hian Parvon case-ah kum 10 chhung tâng tura hrem tur an nei tih a sawi bawk.