Nimin chawhnu khan MNF Ṭhalai Hqrs. hruaitute chu an President Pu PC
Laltlansanga hovin Aizawl Police Station-ah an kal a. Nikuma Congress
Party-in dâwta an puh nia an sawi chungchanga FIR an thehluh tawh, tun
thlenga hmalakna la awmlo leh thudik chhuichhuah ala nilo chu he FIR-a
Case IO hmuin enge a chhan tiin an sawipui
MNF Ṭhalai chuan, nikum khan MPCC Media Cell te chuan dâwta thuchhuah
siamin, Dr.R. Lalthangliana In ah MNYF hruaitu eng emaw zat chu chaw
eikhawmah a puh a. Kha inpuhna kha Zoram mipui hriatah MNF Party tan
hminghliauna thlen theih avang leh Congress Party-in dâwt ngial ngan
hlak mipui min hrilh fo hi ṭhalo an tih avangin MNF Thalai Hqrs chuan
Aizawl Police Station-ah April ni 11, 2012 khan FIR an thehlut a ni
tih an sawi a. Khata FIR thehluh ah khan, Congress Party thuchhuah chu
dâwt a nihzia finfiah a, an puh angin MNF Ṭhalaite hian chaw an
eikhawm reng em tih thudik tak chhui chhuak tur leh, dâwt hlang hlaka
Party thuchhuah an siam chu dân anga Action la turin an ngen tih an
sawi a.
Nimin kha FIR an thehluh aṭanga kumkhat a ni ta tih sawiin, tun
thlenga thudik chhui chhuah a la ni lo chu mak an tih thu leh MNF
Sawrkar lai nise chu Police ten an chhui chhuak daih tawha an rin thu
an sawi a, Mizoram Police Officer ten' Police te hi a chhawrtu a zirin
kan ṭha in kan ṭha lo a ni' ti a Home Minister Pu Zira hmaa an sawi
kha a dikzia a lang mekah MNF ṭhalai chuan a ngai tiin an sawi bawk.
Mi tuemaw Ina chaw eikhawm an awm leh awm loh ringawt kumkhat chhung
teh meuh chhui tur chuan kan Police te hi an tuanfum lova. Heti taka
kan Police te he Case-a an muanna chhan hi, chhui chhuak lo tura thupe
tu awm ngeiah MNF Thalai chuan a ngai tih an thuchhuahah an tarlang a
ni.
Congress Party Worker pakhatin Police te ama mimal In saknaah a chhawr
an dem thu leh dan anga chhui chianga action la turin ziak an ngen
tawh thu tarlangin tun hnu ah chuan Mizoram Police te hi an kut phuar
lo va an hna dik tak chak taka thawh tir tawh tur leh, Congress worker
te Private hna a Police-te chhawr ngai tawh lo turin Home Minister Pu
Lalzirliana an chah tih an tarlang bawk.
MNF Thalai hruaitute lo dawngsawng tu SDPO Aizawl Police Station chuan
he case hi duh anga kal chakpui a harsat thu alo sawi a, an lo en zui
zel tur thu a sawi niin an tarlang a. Aizawl Police Station kawtah
hian MNF Ṭhalai te hi au rualin ‘MNF Ṭhalai te hian enge kan duh -
Police kut phuar phelh’ tih te, ‘Congress Party Worker In sa tura
Mizoram Police chhawr luih hi - kan duh lo, sim rawh se’ ti tein
aurual a ni.
