Kum 2011 – 2012 leh 2012 – 2013 chhunga ramsate thil tihchhiat leh nunna chântute hnenah nimin khan Environment and Forests Department-in zângnadawmna a pê a, sum an pekchhuah zat hi a vaiin `42,16,593/- a ni.
Zangnadawmna hi Mitthi 11, hliam tuar- 10, ran vulh lai ramsain a lak sak 19, buh leh bal tihchhiatsak mi 2439 te hnenah hlan a ni.
Ramsate avanga nunna chântute hi `1,00,000/-a ral an ni a, hliam tuartute hi an inenkawlna senso tum sak an ni a, an ran vulh ramsain a lâksakte chuan ran vulh len dan azira zangnadawmna pêk an nih bakah buh leh bal chântute chu an chän dan leh a tam zawng azira zângna-dawmna pêk an ni bawk.
Hemi puala inkhawm hi PCCF leh Principal Secretary ni bawk Pu JL Singh-an a kaihruai a, Pu Rosiama Vanchhong, IFS, Addl. Principal Chief Conservator of Forests chuan ramsate thil tihchhiat zângnadawmna pek hi sawrkarin a hreh hauh lova, amaherawhchu, ṭanpuina sum hmuh duh vanga dik hlel deuhva tih erawh a ṭha lova, a tuartu dik takte chu sawrkarin a tanpui ṭhin a. Hetianga buh leh thlai emaw, hliam leh thihna hial thleng a awm chuan department lamin uluk takin an enfiah ṭhin ang a, a phute ngei zângnadawmna a pe ṭhin tawh dawn a ni,” a ti.