Mizoram News

ILP neilo man chhuah 1000 vel tlin rin a ni

Kar kalta Thawhlehni zana YMA branch hrang hrangin ram pawn aṭanga
Mizorama lo lût, Inner Line Permit (ILP) neilo an man chhuah chu 1000
vel an tlin rin a ni.

Central YMA Gen. Secretary Pu Vanlalruata sawi danin khaw hrang hranga
an man chhuah zat report kimchang dawn a la ni lova, heti chung hian
ṭhahnem tak an tling tawh tih hriat a ni a, ILP diklo tam tak man
chhuah a nih bakah Mizorama thawk mek Company zingah tuialhthei lai
chhuah hna thawktu ONGC te leh kawng siam hna thawktu Company-te
zingah leh sawrkar laipui hnuaia company te pawhin ILP nei silo,
Identity Card an siamsak te pawh hmuh chhuah a ni a, Sawrkar hna thawk
an nih loh chuan heng mite hi a ruaitute hian thuneitu dik tak hnen
aṭangin ILP an lâksak ngei tur niin Central YMA hruaitute chuan an
sawi a ni.

ILP neilo zawn chhuah hna Thawhlehni a an thawh chungchanga thuchhuah
siamin Central YMA chuan an thawhpui, Police leh YMA member-te chungah
lawmthu a sawi a, kha kha a bul ṭanna tur chauh a ni tih sawiin dân
phal lohva Mizorama awmte dap chhuah kawngah ṭan lak zui zel a ngai
dawn niin a sawi bawk. Central YMA chuan ILP lak saka hnamdang hna
thawka chhawrtu zawng zawngte chu dânin a phut angin an hna thawh
zawha ILP tih tawp sak tura thuneitute hrilh turin a ngen a, in
luahtirtute pawh an in luahtu ten ILP an nei ngei em tih enfiah turin
a ngen bawk.

Hetihlai hian Aizawl district SP Pu L.R. Dingliana Sailo sawi danin
Aizawl district chhunga ILP neilo emaw, thi tawh leh a lem kawl an
man, court-in thiamloh a chantir a thawn let zat hi 341 an ni .