Mizoramah kumin January – March thla chhungin Sikserh vanga thi mi 2 an awm a, thisen exam mi 20,147 zingah mi 767 ah Malaria hrik hmuh a ni.
He thu hi nimina State Vector Borne Diseases Control Programme (SVBDCP) leh Christian Medical Association of India (CMAI) buatsaiha World Malaria Day hmannaah sawilan a ni a, he hun hi Health Minister, Pu Lalrinliana Sailo chuan a hmanpui a, Pu Lalrinliana Sailo chuan Health Dept hmalakna hlawhtlinzia lanna langsar tak pakhat chu kum khata Malaria vanga nunna chan an tlem tial tial chu a ni a ti.
WHO atanga data hmuh theih chinah kum 2011 a khawvel huapa Malaria natna vei chu mi 86,84,85,568 an ni a, Uganda ah vei an tam ber awm in mi 1,18,24,484 zetin Malaria an vei a, India chu rank 18 na niin mi 13,10,367 in Malaria an vei a ni. Malaria avanga thi hi khawvelah 1,06,820 an awm a, Republic of Congo ah thihna tam berin mi 23,748 an thi a, India chu 23 na niin Malaria vangin mi 753 an thi a ni.