NeLICS-in a chhinchhiah danin kumin chhung hian Mizoram-ah mahni intihlum mi 7 an awm tawh a,mi 7 zinga 5 chu mipa niin a dang mi 2 chu hmeichhia an ni. Kumin 2013 January ni 1 atanga nimin thlenga mahni intihlum mi 7 te hi an vaiin inawkhlum vek an ni a, an vai hian kum 15 atanga kum 40 in kar vek an ni bawk a. Mahni nunna an lak chhan hi mithi chhungte an kawm chianna-ah heng mahni intihlum te hi Depression nei vek an ni tih NeLICS Director Dr. Zawmsanga chuan a sawi. NeLics record-a a lan dan chuan nikum 2012 chhung khan Mizoram-ah mahni intihlum mi 82 zet an awm a, heng zinga mi 52 te chu mipa niin, a dang mi 30 te chu hmeichhia an ni. Mi 71 zet te chu inawkhlum an ni. NeLICS hian nikum chhung khan Telephone/SMS leh hmai chhana Counselling pek mi 1700 vel an nei a, kumin January atanga vawiin thleng hian Counselling pek mi 72 vel an nei leh mek tawh bawk. Counselling an pek zinga a tamber chu kum 15-30 inkar an ni.
Loading ...